Pagpamalandong sa Malangkubong kaayohan
Apo siya ni Mae Ong, usa sa mga lektora sa parokya sa Capitol. English paka kining bataa mao nga wala lang tuyoa nga mag-nosebleed gyud kita. Apan usa sa mga nindot nga hiyas niya mao nga kusog kaayo siyang mangutana.
Buot siyang masayod sa tanang mga butang, ug dili lang kay buot siyang masayod, mohatag gyud siya sa dayag nga komentaryo kon unsay iyang nakita apil na niini ang komentaryo sa imong burot nga tiyan.
Paspas ang iyang reasoning, kay ako siyang gikomedyahan nga buntis ko, apan hugtanon siyang nibalibad sanglit babaye ra kuno ang mabuntis ug dili ang lalaki.
Bugtong pahiyom ang akong mabawos ning batang kulit sa kalibutan nga puno sa mga pangutana. Nahinumdom na hinuon ko nga sa dihang nawala ang planeta nga gipangita ni Obi Wan Kenobi, bugtong batang padawan ang nakahatag sa maong panahom nga mas maayo nga moadto sila sa center of gravity aron ang planetang gipangita ilang makit-an.
Sa kinabuhing sama sa bata, nahimong mabulokon kaayo ug makahuloganon ang tanan.