Pagpakgang sa krimen

Managlahi ang reaksyon sa katawhan niining gipatuman karon sa atong Nasudnong Kapolisan nga pagsita o pagbadlong sa mga tawo nga magtambay-tambay sa mga pampublikong dapit panahon sa lawom nga kagabhion.

Dunay nagsige og paghot nga dako kining kalapasan sa tawhanong katungod ug dalan kini sa pagpangabuso sa mga otoridad batok sa mga tawo nga maatlan nila nga anaa pa sa gawas sa pinuy-anan sa oras nga tingkatulog na unta.

Didto sa kaulohan dakong isyu karon ang pagkamatay sa usa ka lalaki kinsa gitanggong sa detention cell kay kuno gibun-og sa mga kaubang piniriso.

Ang biktima unang gisita kay naghukas sa iyang senina samtang anaa sa gawas kay magpa-load sa iyang cellphone sa tindahan apan mao na diay kadto ang mitsa sa iyang kinabuhi.

Hinoon ang maong panghitabo isolated lang kon atong hisgotan kining naasoy’ng palisiya nga gipatuman sa tibook nasod.

Base usab kini sa kamandoan ni Presidente Rodrigo Duterte nga nagtinguha nga mahisama sa dakbayan sa Davao ang tibook nasod sa natad sa disiplina diin magkinto gyud sa kahadlok ang mga tawo sa paglapas sa balaod.

Sa akong bahin, makaayo kining maong palisiya kon mapatuman lang sa atong kapolisan pinasubay sa lagda aron maseguro nga walay malapas nga tawhanong katungod ug dili maabusaran.

Nasabtan nako nga ang oplan tambay o oplan sita, ang himoon sa kapolisan mao ang pagbadlong o estoryahon ang mga tawo nga maatlan sa ilang operasyon, dili nila kini dakpon. Apan sa higayon nga aduna silay makita nga kontrabando nga gidala sa tawo aw alangan man og ilang buhian, sikupon gyud.

Kon kaniadto igo lang magsakay-sakay sa patrol car ang mga pulis, labyan ug tan-awon lang ang mga estambay sa kadalanan nahulog ra sa walay kapuslanan, busa karon gigahinan na nila kini og higayon nga mapakgang ang posibleng kagubot nga mahitabo.

Sa pagtambay ra ba niining mga tawo sa gawas ilabi na kon mangahubog na mao gyud ang sinugdanan sa away nga mosangpot sa pinatyanay.

Nabag-ohan lang seguro ang uban nga wala makauyon sa palisiya nga gipatuman apan sa kadugayan maanad ra ang tanan.