Nganong drugs hotspot

Dili angay ikahibulong nganong nahimong hotspot sa ilegal nga drugas ang Sugbo. Dayag man kaayo nga hinay ug kulang kaayo ang suporta sa mga lokal nga opisyal sa kampanya batok drugas sa administrasyon ni Duterte.

Diin man kaha gikan kining ilegal nga drugas sa Sugbo?

Sa kadaghan sa mga masakmit atol sa mga operasyon sa kapolisan ug sa uban pang law enforcement units, klaro kaayo nga wala pa mapuhag ang tinubdan sa drugas nga anaa dinhi sa Sugbo nagtuyoktuyok.

Aduna bay dakong opisyal nga nagpaluyo niining ilegal nga drugas?

Daghan pa gihapon ang nagtuo nga may opisyal nga nagpaluyo niini. Sa kadaghan sa binulto nga madakpan, makahibulong kaayo giunsa kini sa pagsulod dinhi sa Sugbo.

Kon wala pay nagpaluyong opisyal sa gobyerno, makalusot kaha ang ingon ka daghang bulto sa drugas?

Mismo si PNP Chief Oscar Albayalde mipalanog niadtong Biyernes sa gitug-an ni Presidente Duterte nga ang Sugbo nagpabiling hotspot sa ginadiling drugas.

Hepe na gyud na sa kapolisan sa tibuok Pilipinas ang nag-ingon nga ang Cebu dili pa gihapon drug-free.

Makapila giduaw ni Duterte ang Sugbo. Ug kada duaw, iya gyud nga ipaklaro nga daghan pa gihapon drugas ang Sugbo.

Sa siyudad sa Sugbo kasagaran ang mga dakop nga ang mga madakpan makuhaan og binulto nga ilegal nga drugas.

Ngano man kini?

Wala bay suporta ang kagamhanan ni Mayor Tomas Osmeña ngadto sa kapolisan?

Kumusta na ang incentive sa kapolisan ug mga armas alang sa Cebu City Police Office, nauli na ba sa Cebu City Hall? O naa pa sa ilang posesyon?

Ang kakulang og suporta sa lokal nga kagamhanan ngadto sa kapolisan makaapekto kaayo sa kampanya sa ginadili nga drugas.

Gituyo ba ni Tomas nga walay suporta sa kapolisan aron maghitak ang drugas? Dili tingale, apan tan-awonon kini.

Apan wala ba kamo mahibulong nga sa matag adunay operasyon ang bisan unsang unit sa Cebu City Police Office ug adunay madakpan nga pusher o druglord, dali kaayong maka-post sa Facebook si Tomas o ang iyang alyadong konsehal nga si Dave Tumulak?

Unsa may ‘significant contribution’ ni Tomas o ni Dave sa operasyon nganong silay mopublikar sa Facebook sa dinakpan o sinakmit nga drugas?

O kutob ra gyud sila sa pangangkon? O ba kaha ipalutaw nga aktibo sila sa kampanya sa ilegal nga drugas?

Para nako, ang ilang pagkaaktibo kutob ra gyud sa Facebook. Pero kahibalo si Pres. Duterte nga wala sila maglihok batok drugas. Tiaw mo na, diha sa City Hall daghan kaayong adik. Niadtong Abril, 15 ka empleyado sa Engineering positibo sa drugas.

Kon mao kini, unsaon pagsumpo sa drugas sa dakbayan?