Dili angayang magpalipat ang mga Sugboanon sa lipat-lipat ni Mayor Tomas Osmeña nianang P18 bilyones nga Kawit Island Project sa Gokongwei group.
Gipahibalo sa mayor nga naglaraw siyang mopasaka og kaso batok sa tulo ka konsehal nga dili niya alyado tungod kay matud niya “misupak sa resolusyon nga ila ra usab nga gipasar.”
Unhan ni Tomas og kiha ang mga konsehal nga posibleng maoy mopasaka og kaso batok kanilang moaprobar sa proyekto nga makapaalkanse sa siyudad. Nakakita na og hayag nga kaugmaon sa Kawit Island Project ang mayor sa siyudad karon nga alyado na sa Bando Osmeña Pundok Kauswagan (BOPK) ang Sangguniang Kabataan Federation President nga si Jessica Resch.
Nagtuo usab kini nga ang mosunod nga ABC president magagikan usab sa BOPK tungod kay mas daghan ang midaog nga kapitan nga alyado sa mayor sa miaging barangay election. Apan tungod sa pagbarug sa mga konsehal sa PDP-Laban batok sa maong proyekto tungod sa disbentaha nga mahatag niini sa siyudad, nasayod ang mga Sugboanon nga kon mauyonan kini sa bag-ong mayoriya sa konseho, posibleng mag-atubang sila og kaso sa korte.
Kon uyonan, ang kasabutan (joint venture agreement) maghatag lang kini og 10 porsiyento sa siyudad gikan sa kita sa negosyo diha sa Kawit Island. Ang puhonan sa mga Gokongwei magkantidad og P18 bilyones, samtang ang luna sa Kawit nagkantidad og subra sa P10 bilyones.
Sa ato pa, alkanse kaayo ang siyudad sa Sugbo sa binahinay sa kita nga magsugod pa gyud sa ika-siyam nga tuig gikan sa pagsugod sa negosyo. Kon madayon, ang kampo sa mga Gokongwei, hatagan kini og 50 ka tuig nga pagdumala sa Kawit ug may katungod pa nga mo-reclaim (wala pay klaro kinsa’y manag-iya sa i-reclaim nga luna), unya ‘renewable’ pa gyud tingali og laing 50 ka tuig.
Ang ilang panglipat mao nga human sa 50 ka tuig, maiya na sa siyudad ang mga edipisyo sa Kawit. Apan kon ma-renew, tuloy ang ligaya? Kon dili ma-renew, magamit pa kaha ang biyaan nga mga edipisyo nga 50 anyos na? Seguradong adunay kasong atubangon ang bag-ong mayoriya sa konseho, tingali apil ang mayor, ug dili makalingkawas sa kaso ang SK chairman sa San Nicolas Proper nga si Resch kon moapil siya og botar pabor sa Kawit Island Project nga dili mausab ang terms sa binahinay.
Sayang lang sa kabatan-on ni Resch kon moapil siya sa duwa sa politika, magtubo siyang mag-atubang og kasong kriminal ug administratiba. Dakong hagit kang Resch ug sa mga sakop sa SK mao ang pagbarug isip independente nga dili madala sa mga tanyag nga allowance, scholarship ug P1 milyon nga proyekto. Luwasa ang Kawit nga dili mahimong “Kawat.”