Adlaw sa paghukom

Miabot na ang adlaw sa paghukom. Eleksiyon na sa barangay ug Sangguniang Kabataan, ug milyones ka botante sa tibuok nasud ang magpunsisok karon sa mga presinto aron pagbotar alang sa mga bag-ong lider sa ilang mga barangay.

Alang sa mga botante, kinahanglan dili gayud sila magpadala sa presyur sa mga kandidato. Gani, normal na sa mga kandidato sa posisyon sa gobiyerno ang motingal og salapi sa mga botante, aron lagi pagsakmit sa ilang mga boto.

Kabahin na kini sa politikanhon nga kultura sa Pilipinas.

Gani, ang kwarta ang nag-una nga requirement alang sa mga kandidato ug dili ang ila nga nakab-ot nga edukasyon ug ang kapabilidad sa pagserbisyo.

Kon wala’y sapi ang usa ka kandidato aron igasto sa iyang kampanya, mamunbon gayud siya inig-abot sa eleksiyon.

Naanad na kita nga kwartahay ug dili base sa plataporma ang paagi sa bugno nga lugaynon sa Pilipinas.

Grabe tingali ang kinamangay gabii. Daghan tingali ang nanuktok sa mga balay tungod kay katapusan na man nga hirit sa mga kandidato. Apan mas labing maayo nga ang mga botante dili gayud magpadala sa silaw sa salapi.

Hinuon, wala man tingali problema kon dawaton sa mga botante ang mao nga suborno nga ihatag kanila, basta ang ilang sundon mao ang anaa sa konsensiya ug ang pilion kadto lang angayan ug makamao modumala sa ilang katungdanan.

Apan ang piniliay mag-agad ra gihapon sa katawhan.
Anaa sa atong mga kamot ang kapadulngan sa ato nga barangay, lungsod, dakbayan, o probinsiya kay kita man mismo ang mopili sa ato nga kapitan, mayor ug gobernador.

Mao na nga kinahanglang ato nga tarungon pagpili karong adlawa kon si kinsa sa mga kandidato pagka kapitan ug konsehal ang angay nga ibutang nato sa katungdanan.

Hinaot nga buligan kita sa Kahitas-an sa ato nga pagpili sa maayo nga kandidato.