Dear Atty. Divine,
Duna ko’y pangutana labot sa funeral arrangement sa akong papa. Namatay siya bag-o lang, unya ang akong mama ug ang among kamaguwangan, nagsumpaki kon asa ilubong ang among amahan.
Ang gusto sa akong igsuon nga adto unta ilubong si papa sa lugar diin mi nagpuyo nga mga igsuon aron dali ra ang pagduaw sa iyang lubong.
Apan ang akong mama misupak niini ug didto gyud niya gipalubong ang akong papa sa among probinsya. Wa mi nahimo ug misugot na lang sa kagustohan sa among mama. Ang akong pangutana, kinsa man ang mas dunay katungod nga modesisyon kon asa ilubong ang among amahan, ang asawa, o ang mga anak? Daghang salamat. -Lovely
* * *
Dear Lovely,
Ang inyong mama maoy mas dunay katungod nga modesisyon kon asa ilubong ang imong papa base sa Article 305 sa Civil Code, in relation to Art. 199 sa atong Family Code nga dìin ang order sa paghatag og support mao say basehan sa order kon si kinsa ang mo-decide sa funeral arrangement.
Ang desisyon sa inyong kamaguwangan nga igsuon matuman lang kon pananglit kamo na lang mga anak ang nahibilin. Ang atong balaod nagkanayon nga ang funeral arrangement, ibase kon unsa’y tugon sa namatay, apan kon wa siya’y tugon kalabot niini, ang iyang kapikas maoy modesisyon. Apan kon wa na sab siya’y asawa, o bana, then ang mga anak ang mo-decide apan kon pananglit dili magkauyon ang mga anak, then ang desisyon sa kamaguwangang anak maoy mopatigbabaw. Busa sa kaso sa pagpalubong sa imong papa, ang imong mama mao gyud ang mas dunay katungod nga modesisyon niini. Thanks and God bless! -Atty. Divine
* * *
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.