Sila ra gihapo’y magbuot
Bisan og Bisaya na ang presidente ug giduso na ang federalismo ug inihap na ang mga adlaw sa Imperial Manila, ang nasudnong mga buhatan niinsister nga sila ra’y kamao, ug nga ang mga buhatan sa mga rehiyon dili lang gihapon kasaligan bisan sa labing yanong mga gimbuhaton.
Labing uwahi nga nipasundayag niini mao ang Commission on Elections (Comelec). Namugos ang ulohang buhatan nga sila ra’y makaprinta sa voters’ IDs, bisan og natanggong sulod na sa daghang katuigan.
Karon, nagpaugat na sab nga sila ra’y makasubli sa certificates of candidacy (CoCs) sa mga managan sa barangay ug Sangguniang Kabataan (SK).
* * *
Kini bisan og kapin sa semana na lang ang nahibilin sa dili pa magsugod ang kampanya karong Mayo 4, ug busa apiki na sa makuti nga pagtagsa-tagsa og subli sa kapin sa milyon (1,140,987) ka CoCs sa mga nag-ilog sa 671,168 ka puwesto sa 42,000 ka barangay sa tibuok nasud.
Kini bisan og mas nakaila sa mga managan, mas nasuheto sa mga barangay, mas takus nga mosusi sa matag CoC ug mas paspas makahimo sa opisyal nga listahan sa mga kandidato ug kandidata ang election officers sa matag lungsod ug matag dakbayan.
* * *
Inay mangayo og pasaylo sa ilang kalangayan ug katapolan pagpatik ug pag-apud-apod sa voters’ IDs, nagpapating lang ang Comelec sa pagpahibawo nga certificates na lang ang ilang ipanghatag kay maapsan na sila sa national ID nga gitakdang luwatan na sa Philippine Statistics Authority (PSA) karong tuiga.
Hinaot nga dili sab manghunaw lang ang Comelec nga kay apiki man ang panahon, padaganon na lang ang tanan ug unya na lang susihon kon makalingkod ba, o dili, kon magdaog na.
* * *
Ambot kanus-a pa mapugwat ang mga tagdumala sa Comelec ug ubang nasudnong mga buhatan sa gobiyerno sa karaan na kaayong kamatuoran nga ang Pilipinas wa magsugod ug wa matapos sa Metro Manila, ug nga ang ilang kaubanan sa Sugbo ug ubang bahin sa Pilipinas mahimong sama ra, o mas takus pa gani nila.
Wa pa maklaro kon unsaon sa pagtapos niining higanteng inhustisya sa daghan nga sugyot sa paghupot sa federal nga sistema.
Bugtong nabantang mao nga ang kausaban sa konstitusyon magkahulogan og dugang gastohan pagpalihok sa laing sapaw sa tambok na’ng daan nga burukrasya.
* * *
- Latest
