Ang City Environment and Natural Resources Office (CENRO) sa Lapu-Lapu City naalarma sa grabeng kataas sa level sa fecal coliform sa usa ka bahin sa kadagatan sa Marigondon ug matud pa dili na kini luwas kaligoan. Samtang sa pag-monitor usab sa ubang dapit, duna sa’y nitala og taas nga level sa kagaw diha sa tubig apan dili kaayo makaalarma.
Ang fecal coliform mao ang usa ka matang sa kagaw nga gikan sa hugaw sa tawo ug mga hayop. Gawas pa niini, may lain pa nga matang sa hugaw, o kagaw gikan sa mga nadugta nga patay’ng hayop, o mga basura nga naa sa dagat. Samtang makapabalaka ang pahibalo sa CENRO, dili man hinuon kini sa mga lugar nga sagad kaligoan sa mga beach goers tungod kay kusog ang sulog sa tubig sa maong dapit.
Nagtuo sila nga ang maong hugaw nadala sa sulog gikan sa mga silingang lugar, sama sa Liloan, Consolacion ug Mandaue City. Apan dili layo ang posibilidad nga ang uban niini gikan ra diha sa siyudad sa Lapu-Lapu tungod kay usa man kini ka malambuong siyudad. Sa pagkatinuod, malambuon gyud ang Metro Cebu apan dili matago nga dako pa kaayo ang latasonon nga katuigan, usa pa kini maisip nga eco-friendly metropolis.
Ang mga malambuong lugar kinahanglan gyud unta nga wa na’y bisan usa ka plastic nga makitang gilabay sa dagat, o waste water nga gideritso pagpaagas sa dagat. Daghang land development nga nisulbong sa nagkadaiyang mga siyudad karon, ug kabahin sa rekisitos nga kinahanglang buhaton sa developers mao ang waste water facility ug sewerage system ug uban pa.
Apan daghan gihapon sa mga karaang buildings, commercial ug residential areas nga wala niining mao nga kahimanan, ug nagsalig gihapon sa gubaon ug baradong mga sewerage system sa mga LGUs. Usa kini sa angay tutokan sa LGUs kay makaamong man kini sa mga silingang dapit ang ilang mga hugaw.