Nag-ilog sa kabilin sa igsuon
Dear Atty. Divine,
Duna ko’y pangutana labot sa property sa akong igsuon nga namatay. Ulitawo to siya ug wa’y anak. Patay na sab ang among mga ginikanan.
Ang iyang property naa sa atubangan ug sukad siya namatay ang akong mga igsuon nag-ilog na og pwesto.
Ang akong pangutana kon unsaon man namo pagbahin ang kabilin sa among igsuon nga patas ra unta alang sa tanan? Unsa’y angayan namo nga buhaton? Daghang salamat. — Rosario
Dear Rosario,
Base sa balaod, kon wa’y compulsory heir ang imong igsuon or wa siya’y mga anak nga legitimate o illegitimate ug wa siya’y asawa ug wa siya’y gibilin nga Last Will and Testament, then kamong mga igsuon maoy maka-inherit sa iyang property in equal share kay patay na man sab ang inyong ginikanan.
Dapat inyong ipa-survey ug ipa-subdivide ang property nga patas ang sukod aron dili mo mag-away. Kon dili mo magkasinabot kon unsaon ninyo pagbahin ang property, kay ang ubang igsuon miangkon na og mas dako ug mas maayo nga pwesto, then modangop na lang mo sa korte pinaagi sa pagpasaka og Petition for Judicial Partition sa property sa imong igsuon, then ang korte na ang modesisyon niini.
Mas maayo gyud unta nga magkasinabot mo aron dili na mo mangabot pa sa korte. Thanks and God bless. — Atty. Divine
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.
- Latest