Kinsa ang naghimo?

Dakong binuang ang pagbutang og tarpaulin nga naghulagway nga si kanhi mayor Michael Rama maoy sunod nga patyon tungod sa pasangil nga kini nalambigit sa drugas isip “drug protector.”

Sa tarpaulin nga gibitay didto sa Poblacion Pardo ug nakit-an kagahapon na sa buntag, diha ang mga hulagway sa gipatay nga mayor sa Albuera, Leyte nga si Rolando Espinosa ug sa bag-o pa nga gipatay nga si Atty. Jonnah John Ungab, ingon man ang kang   Rama.

Gipangbutangan og “X” ang hulagway nila ni Espinosa ug Ungab nga parehong patay na, samtang ang nawong ni Rama gilinginan og sa tupad may kasuwat nga pulong “maoy sunod.” 

Maisip nga usa ka pagpanghadlok ang tumong sa naghimo sa maong streamer, ug mahimo usab nga gusto niini nga daoton pag-ayo ang iyang dungog.

Nangangkon hinoon si Rama nga wala gayud siya batia og kahadlok kay nakasabot siya nga pagpakauwaw ra gyud ang tumong sa naghimo sa maong streamer.

Wala magtuo si Rama nga mopahibawo pa ang kriminal kon buot man siya nga patyon. Husto man usab ang argumento ni Rama.

Kon husto man si Rama sa iyang pagduda nga ang numero uno niyang kontra sa politika maoy nagpaluyo niining pagbutang og streamer, aw, husto si Rama nga dili gyud siya mahadlok. Bisan og kontra kaayo sila si Rama ug Mayor Tomas Osmeña, wala ko magtuo nga makahimo si Osmeña pagpapatay og tawo tungod lang sa politika.

Apan, dili gihapon angay’ng mokumpiyansa si Rama kay dili imposible nga sakyan kini sa ubang tawo. Mahimong patyon si Rama aron nga mapasanginlan si Tommy nga maoy nagpapatay niini. Kini ilabi na nga si Tommy, mao ra ba sab ang gipasanginlan nga utok sa pagpapatay ni Ermita barangay captain Imok Rupinta.

Wala gyuy kumo sa pagbantay. Gikuhaan nako og basehanan niini mao ang kaso ni Elpidio “Jojo” dela Victoria, ang kanhi executive director sa Bantay Dagat sa dakbayan sa Sugbo, nga tungod sa subrang kumpiyansa gipatay nga wala gyud makasukol.

Kaniadto makadaghan nako gipasidan-an si Jojo dela Victoria nga dili gyud mokumpiyansa, apan wala mopatuo, mao nga yano lang siya nga gipatay sa nagbinugtong nga kriminal didto pa duol sa iyang panimalay atol sa Miyerkules Santo.

Kon tinuod man ang katahap ni Rama nga politika maoy hinungdan niini, ilabi na nga siya mipahibalo na nga modagan siya pag-usab pagka mayor sa dakbayan, dili maayo.

Angay’ng susihon kon kinsa ang mga tawo nga nagbitay niadtong streamers aron masuta kon kinsa ang responsable.