Pabor-pabor gihapon
TIKDOL SA PORDOY - John Rey Saavedra (Banat) - February 5, 2018 - 12:00am

Dali nga naka-post si Mayor Tomas Osmeña sa iyang Facebook page sa balita sa The Freeman kalabot sa upat ka konsehal – tulo ka sakop sa BOPK ug usa sa oposisyon – nga giingong gipang-tiketan ug gi-clamp ang sakyanan tungod sa pagpataka lang og parking sa karsada.

Kon atong sabton, daghan ang modayeg sa wala’y pabor-pabor nga pagpatuman sa lagda nga nagdili sa pagpataka og parking sa mga sakyanan. Apan ang balita dako nga sagpa kaniya isip lider sa BOPK kay naghulagway ang maong balita nga kadaghanan diay sa iyang mga sakop sa iyang partido BOPK, nga mga konsehal pa sa siyudad, mga malapason sa balaod.

Matud sa balita, sa upat ka sakop sa konseho nga natiketan sa Cebu City Traffic Office, usa lang niini ang oposisyon, si Konsehal Joy Pesquera. Ang tulo ka ka-partido ni Tomas sa BOPK nga natiketan mao sila si Konsehal Sisinio Andales nga usa ka abogado, Jun Gabuya ug Mary Ann delos Santos.

Hain man ang ubang mga konsehal? Mayoriya diha sa konseho mga oposisyon man? Sa ato pa diay, bisan sa kadaghan sa oposisyon, usa lang ang milapas sa balaod sa pagdili og parking sa ilang sakyanan sa dili lugar nga angay parkingan?

Pero kining kalakiha ba, bisan pordoy nakasabot nga propaganda ra gyud kini.      Adunay daghang establisemento diha sa dalan T. Padilla, sama sa usa ka dakong hardware, nga anha magkarga ug diskarga sa ilang mga kabilya, semento, plywood, ug uban pa sa karsada. Usahay mo-double park pa gyud. Nganong wala man isyuhi og tiket sa CCTO ang ilang mga dagkong trak sama sa pag-isyu sa malapasong mga konsehal sa BOPK?

Nagduda gani ko nga kining dakong hardware sa T. Padilla mao kini gipaboran ni Tomas sa iyang pagpasira sa laing usa ka dakong hardware tungod kunohay sa environmental violation. Duda lang ning ato. Pasuroya si Tomas sa dalan sa Inayawan aron makita niya ang kadaghan sa mga nag-parking sa kilid.

Anha sa dalan Tupas, adunay mga bodega sa bugas nga nakabalda sa karsada ang mga dagkong trak. Adunay mga dagkong trak sa softdrinks nga anha magkarga-diskarga sa karsada.

* * *

Angayan hinuong suportahan sa publiko ang bag-ong Executive Order ni Tomas nga nagdili sa counterflowing sa mga sakyanan. Kon ipatuman kini, maayong wala’y pagpihig-pihig sama sa pag-isyu og tiket nianang mga sakop sa konseho. Apan manghinaot ko nga dili lang kini ang buhaton sa mayor pagsulbad sa nagkahuot na nga trapiko sa siyudad. Laing nakadulot og trapiko nga hangtod karon wala matagad ni Tomas mao ang kadaghan sa mga libaong. Bisan asa dinhi sa siyudad, hilabihan kadaghang libaong.

 

Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with