Dear Atty. Divine,
Ang akong friend dunay pending nga kasong criminal sa korte. Gusto siya nga mokuha og Passport, apan tungod sa iyang pending case nabalaka siya nga mo-appear kini inigkuha niya og NBI clearance.
Ang iyang plano mokuha siya og passport using the name of her sister, kay gusto siyang motrabaho abroad. Mao sab kini ang tambag sa iyang amiga. Ang akong pangutana, kon dili ba delikado ang iyang buhaton? Posible ba siyang makakuha og passport gamit ang pangalan sa iyang igsuon? Daghang salamat. — Chona
Dear Chona,
Mas maayo nga tambagan nimo ang imong amiga sa dili pagpadayon sa iyang plano pagkuha og passport using the name of her sister kay usa kini ka kalapasan sa Republic Act. 8239, kon Philippine Passport Act of 1996. Base sa maong balaod, bisan kinsa nga makonbikto tungod sa pagkuha og Passport pinaagi sa paggamit og bakak nga mga inpormasyon, lakip na ang paggamit og pangalan sa laing tawo, adunay silot nga pagkabilanggo sulod sa tulo ngadto sa napulo ka tuig, ug multa nga P15 mil ngadto sa P60 mil.
Ang tawo nga makonbikto niini dili na sab ma-isyuhan og passport hangtud nga matapos ang iyang sentensya. Busa mas maayong tambagan nimo ang imong amiga sa pagkuha og passport gamit ang iyang kaugalingong pangalan kay kon wa’y hold departure order nga gi-issue ang korte batok kaniya, then adunay chance nga ma-isyuhan siya og passport. Thanks and God bless.- Atty. Divine
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.