Kamatuoran mao ang mopatigbabaw
TIKDOL SA PORDOY - John Rey Saavedra (Banat) - January 1, 2018 - 12:00am

Wala na’y mahimo pa ang mga alyado ni Mayor Tomas Osmeña gawas sa pagdepensa kaniya sa panawagan nga apilon kini sa pag-imbestigar tungod sa pagpamanhig-patay kang kanhi Ermita barangay kapitan Imok Rupinta.

Usa sa mga loyal nga alyado ni Tomas nga si Konsehal Joy Augustus Young ang unang mitingog pagdepensa dili lang kang Tomas, kon dili, hasta na ni Wine Miro, ang gidudahang mastermind sa pagpapatay ni Rupinta. Matud pa ni Young nga dili pa igo ang ebidensiya nga maglambigit kang Miro sa pagpatay ni Rupinta.

Pero kon hanap ang ebidensiya batok ni Miro, nganong mahadlok man sila sa gisugyot nga imbestigasyon? Sila si Jimmy Largo ug Jordan Gera, ang giingong mga hitman, seguradong dili manglihok kon walay magsuhol. Kinsa man ang mosuhol nilang Largo ug Gera? Si Miro? Imposible!

Si Miro dili kuwartahan nga makabayad sa pagpapatay kang Rupinta. Giangkon gani niya sa interbiyu sa The Freeman nga wala gani siya’y kuwarta nga ikasuhol og abogado nga molaban kaniya sa kasong murder ug attempted murder nga gisang-at sa kapolisan batok kaniya.

Mao kini ang hinungdan nga gisugyot ni Konsehal Raymond Garcia nga apilon sa pag-imbestigar si Tomas. Pero sa Facebook, dali nga nakahingalan si Tomas kang Raymond nga “idiot” sa iyang post sa pamahayag ni Police Regional Office-7 Director Jose Mario Espino nga “dili politically motivated” ang pagpamanhig-patay kang Rupinta.

Kon dili tinuod nga siya ang “boss” sa “mastermind,” nganong mahadlok man si Tomas sa imbestigasyon? Kon dili tinuod, malimpyo pa hinuon ang iyang ngalan. Sa sinugdanan, initado ni Tomas si Rupinta. Kon nahinumdom kamo, si Rupinta gisuspenso sa Ombudsman tungod sa reklamo sa Philippine Drug Enforcement Agency-7 nga wala motabang kanila si Imok sa kampanya batok drugas sa Ermita.

Si Tomas ang unang mipakpak sa pagkasuspenso ni Rupinta ug sa tibuok konseho sa Ermita. Dihang mitumaw ang isyu sa ihulip, si Tomas ang nangugat nga si Wine Miro maoy iyang gusto nga ibutang.

Diha na mahibaw-i nga si Miro, bata-bata diay ni Tomas. Dili ba si Tomas usab ang nagbutang kang Miro isip market administrator aron lubogon ang panghawod ni Rupinta sa Carbon market?

Human niini, gigubot ni Miro ang mga vendors tungod sa isyu sa arkabala. Si Tomas mipa-demolish sa barangay outpost sa Ermita nga anaa sa Carbon market. Human mamatay si Rupinta, dili ba si Tomas ang nag-una-una og pamahayag nga nalipay siya nga namatay si Rupinta? Unya karon nga adunay panawagan nga apilon siya sa imbestigasyon, modayon siya og kisi-kisi?

Kon ako si Tomas, maayong atubangon niya ang imbestigasyon kay kon dili tinuod ang mga pasangil, ang imbestigasyon ang molimpyo sa iyang ngalan. Kamatuoran ang mopatigbabaw, dili ang post sa Facebook.

Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with