Sa makausa pa, ipahigayon na usab dinhi sa Sugbo ang Ironman 70.3 nga salmotan sa mga atleta gikan sa nagkadaiyang kanasuran sa kalibutan.
Matud pa nga 2,500 ka triathletes gikan sa 45 ka nasud ang gipaabot nga magtigi karong Agosto 6. Ipahigayon ang international event sa dakbayan Lapu-Lapu, Mandaue City, Cebu City ug Talisay City.
Busa hugot kaayo ang seguridad nga ipatuman sa kapolisan ug ubang mga ahensya, ilabi na ang mga concerned local government units. Dili kini angayan nga kumpiyansahan sanglit nakatutok ang mga mata sa kalibutan niining panahona.
Ang ingon niini nga kalihukan, humot kaayo alang sa mga tawo nga adunay dautang tinguha nga mosakay sa panahon aron nga manglawgaw.
Lakip niini ang mga kawatan nga nag-atang nga makapangbiktima, ilabi na sa mga langyaw’ng bisita nga posibleng maglulinghayaw inig-abot nila sa Sugbo kay sugod ugmang adlawa ra ba, may mangabot na nga mga atleta.
Labaw sa tanan, ang angay’ng bantayan pag-ayo mao ang posibleng pag-atake sa mga terorista, simbako lang. Hinoon, giklaro sa kapolisan nga wala sila’y nadawat nga intelligence report mahitungod sa terror threat.
Apan wala sila’y kumpiyansa aron nga dili malutsan sa mga dautang elemento.
Ang Lapu-Lapu City Police Office nakig-alayon sa Coast Guard, Navy, Airforce ug sa mga opisyal sa kabarangayan aron maseguro nga malinawon ang pagpahigayon sa Ironman.
Bisan og sa Lapu-Lapu City nakasentro ang kalihukan, apan angay nga hugot ang pagpangandam sa mga kasikbit nga siyudad sa Mandaue, Cebu ug Talisay.
Nagmalampuson ang nangagi nga pag-host nato sa Ironman sukad sa tuig 2012, ug ipadayon nato kini pinaagi sa pag-igmat usab sa komunidad.