Misulat og mibarug ako sa gipahigayong public hearing ug gipalanog sa katawhan sa Sugbo ang dakong pangutana kun gikinahanglan ba gayud nato ang BRT? Dili ba kita mabalaka sa sangputanan niini, ubos sa mga pangutana?
Una, gikinahanglan ba nato nga pamutlon, o ibton ang liboan ka mga kahoy? Unsa man ang mahitabo sa Jones Avenue kun wala na ang kakahuyan? Dili ba mawad-an na kita og kapasilungan gikan sa naglagiting nga kainit?
Ikaduha, isakripisyo ba nato ang panginabuhian sa liboan ka draybers ug operators nga maapektohan? Ikatulo, dili ba kini makamugna’g pwerhisyo ug kalisud sa atong mga lakaw batok sa pipila ka tuig nga pagtrabaho sa BRT?
Ikaupat, kasulbaran ba gyud ang BRT sa atong trapik? Dili ba kaha makapasamot lang kini sa problema? Sama sa Metro Manila nga anaa na nila ang tanan LRT, BRT ug uban pa.
Tungod niining mga katarungan, dili ba kaha makawang lang ang atong binilyon ka pesos nga investment sa BRT? Basin unya og pasakaan nila ang buhis og mga multahan?
Subo kaayo palandungon kining kawala’y kaseguroan sa unahan. Aron dili kita mahinayak, angay unta nga tutukan una nato ang pagpangita’g mga paagi kun unsaon pagsulbad sa problema sa trapik, ilabi na ang grabeng gidaghanon sa mga sakyanan sa kadalanan.
Pananglitan diri sa naghuot nga Mango Avenue, kun maadlaw nga Domingo, luag ug paspas man kaayo ang dagan sa mga sakyanan, wala’y trapik. Mao unta kini ang gusto nato nga makab-ot. Mahitabo lang kini sa kooperasyon sa tanan.
Una, pinaagi sa tinuoray nga pag-regulate sa mga sakyanan. Makatabang usab ang “Odd Even Scheme” ug aron kini mapatuman, gikinahanglan ang “Strong” political will” gikan sa LTO ug LTFRB sa maong lagda.
Base sa maong pagsulay, mamasin kita nga moluag ug maarang-arang ang trapik, seguro wa na kinahanglana ang BRT.