Gisaulog ang adlaw sa pamuo, o Labor Day niadtong Mayo 1, apan alang sa uban nga mamumuo wala’y angayan nga isaulog sa naasoy nga adlaw sanglit wala man sila’y nadawat nga kaayohan.
Kini sama sa gilauman nga umento sa suholan nga kada tuig na lang nga sige og pangayo sa sektor sa pamuo.
Gipadayag ni Director Elias Cayanong sa Department of Labor and Employment (DOLE)-7 nga imposible kini tungod kay wala sila’y nakita nga basehan o supervening condition aron mahatag ang gitinguha nga wage adjustment.
Samtang atol sa Labor Day celebration, gipahigayon usab ang job fair sa managlahing dapit nga gidagsa sa mga aplikante. Klase-klase lang ang mga tawo nga nangindahay nga makakaplag og trabaho. Adunay mga bag-ong graduate sa high school ug college, aduna usa’y bag-o nga ni-graduate sa unom ka bulan nilang kontrata sa gialagaran nga kompaniya.
Kini ang estilo sa mga kompaniya nga dili gusto mo-regular og trabahante, ug aron dili masugamak sa lagda sa panarbaho, kinahanglang kutob lang gyud sa unom ka bulan ang mga trabahante.
Asa na man ang gisaad sa Duterte administration nga Endo, o pagwagtang na sa contractualization? Murag lisud kaayo kining lauman kay hanap nga mapatuman. Hinuon taas pa man ang panahon, basin og maimplementar kini sulod sa pamunoan ni Presidente Duterte.
Apan dili lang kaayo kita molaum kay sakit kaayo nga magdahum sa saad nga kita mismo nasayod nga imposible nga mahitabo. Ang Labor Day kutob lang gyud sa taphaw nga seremonyas alang sa gobiyerno ug adlaw usab sa protesta sa mga mamumuo nga naningil sa gipangsaad sa atong namunoan.