Sayop ang entry sa gender sa birth certificate

Dear Atty. Divine,

May pangutana ko labot sa akong birth certificate kay ang nabutang "female" man imbes "male." Gusto unta ko nga mokuha og Passport aron maka-apply og trabaho sa abroad, apan nagtuo ko nga mosango ko, tungod sa akong gender. Dugay na ko nga nagplano nga ipausab kini apan wa man ko’y budget.

Ang akong pangutana kun mahimo ba nga mokuha ko og passport ug mo-submit lang ko og affidavit about sa akong gender? Dako ba og magasto kun akong ipausab ang gender sa akong Birth Certificate? Daghang salamat.—Ronnie

Hi Ronnie,

Posible gyud nga mosango ka sa pagkuha nimo unya og Passport tungod sa imong gender. Apan mahimo sab nga imong suwayan, ug kun ilang makita ang sayop nga gender, then mo-submit ka og Affidavit of Two Disinterested Persons nga maoy mo- attest sa imong gender ug mopamatuod nga imo na nga Birth Certificate ug nasayop lang ang entry sa gender.

Apan kun dili gyud ka makalusot niini, pakurihean gyud nimo ang imong gender sa Birth Certificate. Dili man hinuon dako kaayo ang imong magasto niini kay adto ra man kini nimo ipasaka sa Local Civil Registrar diin ka marehistro, ug dili na kini moagi pa sa korte. Ang maayo nimo nga buhaton karon mao ang pagpangayo sa Civil Registrar og listahan sa mga dokumento nga angay nimong i-submit alang sa pagkuriher sa imong Birth Certificate.  Thanks and God bless. -Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.