Dugang mga hinungdan ngano kita permi man gikapoy bisan og wala’y gibuhat. Ania atong tukion ang mga mosunod;
* Kulang sa ‘iron’ – mao nga magluya ang lawas kay kulang sa sustansyang ‘iron’. Gikinahanglan kini sa dugo aron makabiyahe ang oxygen nga ilibot pagsuplay sa mga selyula sa atong lawas, para mobaskog kini. Kun mangaluya ning mga selyula, mao say bation nato, nga magluya murag permi ta gikapoy. Makatabang ang mga pagkaong nagbaton og ‘iron’ sama sa unod sa karne (lean meat), utanong dahunan, itlog, ‘peanut butter,’ paresan og pagkaon nga abunda sa bitamina-C, aron daling motuhop sa lawas ang ‘iron’.
* Gusto maperpekto – matawag nato ni morag segurista, apan sagad ini mga negatibo’g panghunahuna. Kay wala pa gani mabuhat ang giplano niini, gikutasan na ang utok, sa pag-umol og paagi kun unsaon ang mga imposible maperpekto ang realidad. Hangtud nga mao na’y permi bation ang kanunay nga gikapoy. Kay dili man masarangan sa paminsar. Matud ni Irene S.Levine, PhD. usa ka propesor sa Psychiatry sa New York University nga kinahanglan balansehon pag-ayo ang buot tinguhaon, kalkulohon ang limitasyon sa katakos.
* Ang kabalaka – nga kanunay gihapin sa hunahuna ang panagana ug kahadlok, makapaugtas sab sa utok, dili na katarong unsay maayong buhaton. Kinahanglan batasanon ang pagginhawa’g lawom, nga makahanggap og hangin aron nga makagawas ang giluom nga kabalaka. Kay kun pasagdan ni’ng papuy-on sa kahiladman, magsalimuang ang lawas nga mahutdan sa kusog o enerhiya. Ang kabalaka, mao’y mopatay sa buhi’ng paglaum sa mabulokong kinabuhi.