Unsaon pag-withdraw og kuwarta kun ang depositor anaa sa ospital?

Dear Atty. Divine,

Duna koy pangutana labot sa bank deposit sa akong auntie nga anaa karon sa Intensive Care Unit (ICU) sa hospital? Wala siya’y anak ug wa sa’y bana. Kami nga iyang pag-umangkon maoy nag-atiman kaniya. Ang problema kay we really need money para sa iyang tambal ug sa hospital bills, apan dili mi maka-withdraw sa iyang kuwarta sa bangko kay wa man mi Special Power of Attorney or SPA. Mahimo ba namo nga papirmahon og SPA ang among auntie bisan kun anaa siya sa hospital? May yuta sab siya nga mahimo unta namo nga ibaligya aron igasto sa iyang pagpatambal apan dili sab namo mahilabtan kay wa gihapon mi SPA. Unsay among buhaton attorney kay naglibog na gyud mi? Daghang salamat. — Lisa

Dear Lisa,

Kanang pagpapirma sa imong auntie og SPA diha sa ospital, mahimo man na kun conscious siya ug iyang nasabtan kun unsay iyang gipirmahan. Mahimo ka nga mo-request sa iyang abogado nga moadto siya sa hospital aron pasabton ang imong auntie sa inyong gipahimo nga SPA ug aron siya makapirma og manotaryuhan ang dokumento. Apan kun dili gyud makapirma ang imong iyaan kay critical ang iyang kondisyon, then dili gyud kamo makapugos niini. Ang lain ninyong option mao ang pagdangop na lang sa Korte ug mo-file kamo og petition aron kamo itudlo sa korte nga maoy administrator sa kabtangan sa imong iyaan, apan dili kini dali nga mahuman kay aduna kini proseso. Ang inyo lang seguro nga mabuhat pagkakaron, kun dili pa gyud mahimong makapirma ang imong iyaan sa SPA, mao ang paggamit sa title sa iyang property isip collateral sa ospital ug kun maulian na ang imong iyaan, diha pa ninyo i-settle ang tanan ninyong obligasyon sa ospital. — Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.