Karong nadakpan na si Kerwin Espinosa, ang gipasanginlan nga drug lord sa Eastern Visayas nga nagtagu-tago sa niaging upat ka buwan, mapugos na gyud siya sa pag-atubang sa mga kasong kriminal nga gipasaka batok niya.
Bisan mao pay pagtaral niya uban sa iyang amahan nga si Albuera Mayor Rolando Espinosa Sr. ug kaubanan sa korte sa Leyte, gipanghinaot nga makairog na ang husay sa mga kaso batok nila.
May laing kapuslanan ang pagkasikop ni Kerwin: Mahimo nga mohatag siya og kasayuran ngadto sa kapolisan ug ubang ahensiya sa gobiyerno nga makabisto sa mga sindikato ug mahimo gani nga makapahagsa sa mga durugista nga mas dagko pa niya.
* * *
Si Chief Inspector Jovie Espenido, ang hepe sa Albuera police nga naatlang nipauli sa iyang pamilya sa Dakbayan sa Sugbo dihang nasikop si Kerwin sa Abu Dhabi gahapon sa kaadlawon, maoy usa sa labing malipayon sa kalamboan.
Siya ang nasuhito sa dili maayong binuhatan ni Kerwin sa mga lalawigan sa Leyte ug Samar. Gani pag-asumir gyud niya sa puwesto, gipasidan-an dayon niya si Kerwin nga bitayon sa flag pole sa munisipyo kun madakpan. Gipamatud-an dayon ni Espenido nga dili siya kutob lang sa pagarpar pinaagi sa pagronda sa compound sa mga Espinosa, nga namunga og mga kaso ug nisangpot na karon sa pagkapriso ni Mayor Espinosa.
* * *
Apan si Espenido sab ang nipalili sa posibleng direksiyon sa gobiyerno: Kini mao ang paggamit sa mga Espinosa aron pagkuha sa mas dagkong isda.
Nisiwil ning taktika dihang ginganlan ni Espenido sila si Peter Lim sa Sugbo ug Peter Co sa New Bilibid Prison (NBP) nga maoy labing dagkong mga tinubdan sa shabu ni Kerwin; ug iyang gipapirma og affidavit sila si Mayor Espinosa, nga padayon nga nanghimakak og bisan unsang kalambigitan sa raket sa iyang anak, ug ang nadakpan nilang bodyguards, nga gipaubos na sa Witness Protection Program sa Department of Justice (DOJ), aron paghingan sa mga protektor sa lapad nga ilegal nga negosyo ni Kerwin.
* * *
Sa wa pa mosurender si Mayor Espinosa ug sa wa pa madakpi si Kerwin, gihulagway sila nga dagko ug bangis nga mga durugista. Apan karon nahimo na lang nga tinubdan sa kasayuran. Ug ang gitumbok nga mas dagko pa kanila nagpabiling gawasnon (Lim) ug gihatagan og immunity sa iyang testimoniya sa Kongreso (Co).
Hinaot nga dili mabiyaan ang katawhan nga magbitbit og basiyo nga buyot ning gubat batok sa ilegal nga drugas. Peligro nga matabla ang mga kaso batok sa gipasanginlan nga drug lords bugti sa ilang pagduot sa mga kaatbang sa administrasyon nga gipasanginlan nga nidawat og kuwarta sa ilegal nga drugas, labi na kun, sama nilang Co ug Mayor Espinosa, moapil sila og tulisok ni Senador Leila de Lima.