Tunghaan susihon

Pagkadali modagan sa panahon kay pila na lang ka semana gikan karon, mobukas na pud ang klase.

Gani ang inyong kabomberohan nangandam na alang niining programa nga Brigada Eskwela aron ipakita ang bayanihan spirit niining maong kalihokan kay ang mga ginikanan, estudyante, mga magtutudlo ug uban pang mga sektor sa katilingban magtambayayong nga ang tumong mao ang pagpangandam sa pagbukas sa klase.

Sa among bahin, gitahasan kami sa pag-inspect sa mga tunghaan kun luwas ba kini sa sunog ug mohimo dayon og rekomendasyon kun adunay makita nga violation sa Fire Code.

Kinahanglan nato nga masiguro nga luwas ang matag tunghaan sanglit mga bata ang sagad anaa sa maong building. Kinahanglan nga adunay mga fire protection equipments, sama sa mga fire extinguisher ug uban pa nga maka-standby aron dali kining magamit kun adunay sunog nga mahitabo.

Labaw sa tanan kinahanglan namong makita kun may igo ba kini nga fire exits aron panahon sa emergency magamit kini alang sa luwas nga pag-evacuate gikan sa nasunog nga building paingon sa luwas nga lugar.

Ug kun pananglit among makita nga ang mga fire exits adunay mga obstruction, sama sa gipangbutang nga mga gamit, amo dayon kining pahawanan diha-diha kay klaro kaayo sa Fire Code nga ang mga fire exits kinahanglan nga accessible kini ug walay makababag ug dili kini kandadohan.

Hinaot nga hapsay ra unya ang pagbukas sa klase karong sunod buwan.