Dear Atty. Divine,
Duna ko’y pangutana labot sa akong giabangan nga apartment. Duha ka tuig na mi nga nag-abang sa maong apartment ug naa mi sa taas nga bahin. Pagkakaron medyo guba na ang flooring niini kay kahoy man busa gusto unta namo nga ipa-repair. Ang akong pangutana kun kinsa man angay nga mogasto sa pagpa-repair niini, ang tag-iya sa apartment or kami nga nag-abang? Kun kami ang mogasto sa pagpa-repair, ma-deduct ba kini sa among rental? Daghang salamat. — Josie
Dear Josie,
Base sa balaod, ang nagpaabang or lessor obligado sa pagmentinar sa apartment nga iyang gipaabangan ug sa pagpa-repair sa gikinahanglan nga ayuhon. Kana maoy nalatid sa Article 1654 sa atong New Civil Code. Hinuon kun nabutang sa inyong kontrata nga ang nag-abang maoy mohimo sa pag-repair ug i-deduct lang ang nagasto niini sa iyang abangan, then mahimo ra sab kini.
Busa ang maayo nimong buhaton mao ang pag-review sa inyong Lease Contract aron imong masayran kun unsay nabutang sa terms and conditions niini. Kun wa gani mahisguti ang kalabot sa pag-repair then imong sultian ang lessor nga kinahanglan na nga ayuhon ang flooring sa apartment ug mahimo sab ikaw nga motanyag nga maoy mopaayo apan imong i-deduct sa monthly rental ang imong nagasto niini. So magdepende ra gyud kini sa sabot ninyo sa tag-iya sa apartment. Thanks and God Bless. - Atty. Divine
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.