Gibuksan ang ika-51 nga International Eucharistic Congress (IEC) pinaagi sa usa ka santos nga misa nga didto gipahigayon sa Plaza Independencia ning dakbayan sa Sugbo kaniadtong Domingo sa hapon.
Gitambongan kini sa gibanabana nga 350 ka libo ka mga Katoliko. Ang Santos nga misa gipangulohan sa representante sa Santo Papa nga si Cardinal Charles Maung Bo nga gikan sa archdiocese sa Yangon, Myanmar.
Ang International Eucharistic Congress pagahimoon matag upat ka tuig ug gisugdan kini kaniadtong mga tuig 1800. Ikaduha pa lang kini nga napahigayon sa Pilipinas human kini nahimong host kaniadtong 1937, diin ang susamang kongreso gipahigayon didto sa kaulohan.
Sa iyang wali, gipasabot ni Cardinal Bo ang labihang paghigugma sa Santo Papa sa mga Filipino, ug iya usab nga giasoy ang pagkamaayong moabi-abi ug moatiman sa mga Pinoy ngadto sa mga pari ug mga tinugyanan sa simbahan.
Lain usab niya nga mensahe sa iyang wali mao ang pagpakabana sa mga kabus. Iyang giingon nga ang kabus ug Eukaristiya dili magbulag. Ang gibana-bana nga napulo ka milyon ka bata nga namatay matag tuig tungod sa kagutom ug kakulang sa nutrisyon mao ang labing dakong sala nga mortal.
Ako nanghinaut nga ang International Eucharistic Congress nga gipahigayon dinhi sa Sugbo magbunga ug magbilin unta kini og mga maayo nga pagtulon-an.
Sa tanang mga delegado gikan sa nagkalain-laing suok sa kalibutan ug sa tanang mga bisita nga miabot dinhi sa Sugbo, Maayong Pag-abot!