Sa akong yutang natawhan didto sa lungsod sa Bien Unido sa lalawigan sa Bohol namo gisaulog sa akong hamiling kapikas ang among ika-19 ka tuig nga civil nga kaminyoon ug ika-9 ka tuig sa simbahang Katoliko.
Ang selebrasyon among gituyo aron makauban ang mga sakop sa among pamilya.
Ako nga pasalamatan ang among singing priest sa lungsod sa Bien Unido nga si Fr. Rey Omamaling nga maoy mi-officiate sa among misa pasalamat ug si Mayor Niño Boniel sa Bien Unido nga nag-imbitar kanako sa konsiyerto sa Side A band.
Ako pud nga pasalamatan ang mga opisyal sa Barangay Santo Tomas, Trinidad, Bohol nga init nga miabi-abi kanamo ug nangimbitar sa ilang Christmas party.
Dako namo nga kalipay ug sa akong kapikas nga si Nora ug lima namo ka anak nga sila si Jheremy, Jay, Honey, ug kaluha nga sila si Hennah ug Hannah nga bisan sa kamubo sa panahon, among gikauban sa makadiyot ang among mga pamilya.
Kami nagapasalamat sa Ginoo nga gipaabot sa maong gidugayon ang among kaminyoon ug padayong nagapanghinaot nga hatagan pa og taas nga lugway sa among panag-uban ug malampuson nga lig-ong pamilya.
Kami nagatoo nga ang lig-ong pamilya mao ang tubag sa mga social nga suliran sa katilingban ug kriminalidad.
Maayong Pasko kaninyong tanan!