Daghan ang ganahan nga maminaw kun ang usa ka tawo, labi na og opisyal sa kagamhanan, walay lipud-lipod nga manulti. Apan posible usab nga mangyam-id na ang mga tawo kun kini pasubrahan.
Kini ang nahitabo ni Davao City Mayor Rodrigo Duterte nga bisan unsa na lang ang gisulti ug mitug-an pa nga napikal siya kaayo diha nga mianhi sa nasud si Pope Francis sa miaging tuig tungod kay nakamugna kini og grabeng problema sa trapiko.
Gitug-an ni Duterte nga nagplano unta siya nga tawgan ang Santo Papa ug balikason pinaagi sa pulong nga sagad litukon sa mga Tagalog “Put___ Ina ka, umuwi ka na at huwag ka nang bumalik dito.”
Kini maoy dakong sayop nga nahimo ni Duterte kay daghang mga relihiyoso ug miyukbo pag-ayo sa Santo Papa ang masuko na kaniya ug hayan dili na mopaluyo sa iyang kandidatura.
Dinhi sa Sugbo, si Arsobispo Jose Palma miingon nga angay gyud unta nga respitohon ang Santo Papa, ilabi na nga kini mapahiubsanon kaayo sa iyang pagkatawo ug manggiluy-on sa mga kabus nga biktima sa katalagman.
Ang pag-angkon ni Duterte nga daghan siya og mga babaye nga nalambigitan, gawas sa iyang asawa, posible nga dili lang kaayo tagdon sa uban. Apan isip tawo nga nangandoy nga mahimong pangulo sa nasud angay unta siya nga ehemplo sa uban.
Isip pangulo sa usa ka nasud, angay nga batonan niini ang batasan nga ligdong, matinahuron, lig-on sa iyang mga baruganan ug makamao nga maminaw sa mga sentimento sa kadaghanan.
Ang pagka walay respeto sa uban, ilabi na sa labaw sa atong relihiyon ug ang pag-usab-usab sa baruganan sa usa ka tawo, nagpaila lang nga dili kini haum nga hatagan og kumpiyansa aron himuong lider sa nasud.