EDITORYAL – Dili kaha motalaw?

Dili imposible nga kay nagkaduol na man ang eleksyon, kawad-an og kaisog ang mga opisyal sa dakbayan sa Sugbo pagpaninguha nga mabalik unta ang karaang gilapdon sa kasapaan aron malikayan ang paglunop kun adunay kusog nga uwan.

Sagad sa mga opisyal sa kagamhanan nga gusto’ng magpasubli pagbalik sa ilang katungdanan maglikay g’yud nga makapasuko sila sa mga tawo nga ilang botante samtang magkaduol na ang eleksyon.

Diha nga si Mayor Michael Rama midaog na pagka mayor sa dakbayan sa Sugbo kaniadto’ng 2010, gibutyag dayon niya ang iyang plano sa pagbalik sa karaang gilapdon sa kasapaan apan hangtud karon wala gihapon mapatuman sa ubay-ubay nga mga sapa. Ang kahakog sa mga tawo nga namuyo daplin sa kasapaan nga mipagamay sa orihinal nga gilapdon sa sapa maoy nakaingon sa problema nga kanunay na nga maglunop kun mag-uwan.

Nindot unta kun tinud-on ni Tinago Barangay Kapitan Joel Garganera, pangulo sa Cebu City Reduce Danger Zone on Rivers (RED-R), ang iyang pasalig nga bisan og kandidato siya pagka konsehal dili siya mahadlok nga motuman sa gitahas kaniya sa mayor.

Ang pamahayag hinuon ni Kapitan Garganera kadudahan kun kahatagan pa ba og katumanan sanglit isip usa ka kandidato sa umaabot nga eleksyon dili man maayo nga magpadayon siya sa katungdanan nga gihatag sa mayor kaniya.

Ambot kinsa kaha dinhi sa dakbayan ang adunay kaisog sama ni Bayani Fernando nga walay kahadlok nga moguba sa mga illegal structures nga gitukod sa mga mapahimuslanong lumolupyo nga nakapahasol sa daghang katawhan, diha sa mga aseras ug kasapaan.