Ang nahitabo sa usa ka maestro sa Banilad Elementary School nga nadasmagan og sakyanan kay wala mosubay sa gitukod nga skywalk angay’ng himuon nga leksyon sa publiko.
Si John Rey Sanchez, 35-anyos nga taga Barangay Bacayan mitabok lang deritso sa Governor Mariano Cuenco Avenue bisan og adunay daghang sakyanan nga nagsugat-sugat sa karsada kaniadtong Biyernes sa gabii.
Kun misubay pa ang maestro sa gitukod nga skywalk dili gayud siya madam-agan sa sakyanan pa gayud nga giisyu sa Cebu City Hall ngadto ni Konsehal Richie Osmeña.
Nagdali-dali si Sanchez sa paglakaw aron dili siya madam-agan sa usa ka PUJ, apan igo lang g’yud nga nakalikay siya sa PUJ mao g’yud ‘sab ang pagguho sa sakyanan sa City Hall ug aksidente nga midumbol g’yud kaniya.
Ang kagamhanan migasto og labing menus upat ka milyon ka pesos aron sa pagtukod sa mga skywalk, apan subo kaayo kay ang mga tawo wala mogamit niini aron luwas unta sila sa mga nagdagan nga sakyanan.
Ingon niini ang makita nato diha duol sa mga skywalk nga ang mga tawo molabang ra sa karsada ug ibaliwala lang ang estraktura nga gigastohan sa kagamhanan alang sa katawhan.
Kun maluwas man ang maestro gikan sa iyang nahiaguman tingali makakat-on na g’yud siya’g leksyon nga angay gayud nga mosubay kita sa mga skywalk paglabang sa karsada, kun anaa kining maong kahimanan.
Alang sa kagamhanan sa dakbayan sa Sugbo unta dili nila hunongon ang pagtabang sa medical expenses sa biktima kay sakyanan sa City Hall ang nalambigit sa aksidente.