Daghan ang nangambisyong mahimong presidente karong 2016, apan kutob lang kini sa ambisyon tungod kay ang kamatuoran, ang mga botante gihapon maoy magbuot kinsay palingkuron.
Pipila sa mga nangambisyon karon nagsalig lang sa ilang popularidad, koneksyon ug uban pa nga kutob lang sa papel apan wala sa buhat ug kasinatian.
Sama na lang ni Davao City Mayor Rodrigo Duterte, di ikalimod nga adunay mga tawong ganahan niya nga ma-presidente. Apan kun tan-awon og maayo, kinsa may ganahan ug kinsay di ganahan niya? Hinuon gianunsyo niya nga di siya mokandidato.
Duna pay uban nga nagpakita-kita na sa publiko og interes nga mokandidato pagka-presidente ug duna say uban nga hangtud karon wala pa mobutyag sa ilang intensyon kay nagpaminaw pa sa sentimiyento sa katawhan.
Ang nakaparat niining ubang nangambisyon, nabutahan sila sa nakita nilang suporta sa mga tawo sa matag higayon nga motambong sila og mga kalihokan sa nagkadaiyang lugar.
Wala nila hunahunaa nga kanang mga mitambong posibleng mao ra nay botante nga maila sa maong lugar, kay kun ganahan g'yud kanila, mahurot-hurot g'yud og adto ang mga tawo sa ilang mga kalihokan.
Ang uban kanila nagtuo pud nga ingon niana na sila kaimportante sa mga tawo ug sila lang ang makahaw-as kanila sa kalisod.
Apan tanan man sigurong na-presidente sa Pilipinas ingon niana man og pagtan-aw sa ilang kaugalingon sa sinugdanan dili ba? Apan unsa may ilang nahimo?
Busa, pahimangno ngadto sa mga botante, ayaw pagpadala sa mga kandidatong pulos tagawtaw, dunay lama sa kurapsyon, bakakon, dili kasaligan ug kaugalingong interes inay sa nasud ang giuna.