Husto g’yud kaayo ang kumentaryo sa usa ka motorisa ang mga opisyal sa kagamhanan dili na g’yud unta angay’ng maghuwat pa nga adunay moreklamo usa pa sila moaksyon.
Kinahanglan nga ang mga opisyal sa kagamhanan mag-inabtik sa ilang mga mata aron kini makakita kun unsa ang angay’ng lihukon nga dili na magpaabot nga adunay moreklamo.
Sama sa isyu sa mga abusado kaayo nga lumolupyo diha sa Kamagong Street ug Cabantan Street nga mipalapad sa ibalay balay ngadto na sa karsada ug nakalisod sa pag-agi sa mga sakyanan.
Sagunson ang mga awhag gikan sa mga motorista kay ang mga hingtungdang opisyal sa kagamhanan ingon man sa nahikatulog sa ilang katungdanan.
Karon, ang Cebu City Transportation Office (CCTO) mihimo na og resolusyon nga nag-awhag sa City Legal Office aron padad-an og demanda ang mao nga mga tawo nga gub-on ang ilang illegal structures nga anaa na sa aseras.
Wala masayop ang kadagkoan sa CTO nga kun mahawanan unya mapalapad ang Kamagong Street, ang mao nga karsada makatabang nga dili na kaayo huot ang Gorordo Avenue.
Ingon usab niini ang sitwasyon sa Cabantan Street diha sa Barangay Luz. Kun mapalapdan kini nga karsada pinaagi sa pagguba sa mga illegal structures, aw, tulin kaayo nga moagi ang mga sakyanan.
Unsaon, ang kadagkoan sa kagamhanan, sama sa PROBE Team nanghinan-aw lang sa mga illegal structure. Anaa sa eskena Sikatuna ug Bonifacio ang aseras gihimoan og grahe, ug sa atbang ‘sab nga aseras gihimo nga kan-anan.