Dear Atty. Divine,
Ang akong mga ginikanan nakapalit og 12 hectares nga agricultural land apan kaniadto’ng 2006 ang kasikbit niini nagkoral sa ilang yuta ug milapas kini og mga tunga sa ektarya sa property sa among mga ginikanan. Pagkahuman, ilang gibaligya ang maong portion ug karon gibalayan na sa nakapalit. Among gipahibawo ang kapitan ug gibadlong na sila apan wala mopatuo. Hasta ang kahoy sa maong dapit ilang giputol. Unsay angayan namong buhaton? – Mona
Dear Mona,
Ang una ninyo’ng buhaton mao ang pagpasaka og reklamo sa barangay diin nahimutang ang maong property. Kini aron mapatawag ang tawo nga milapas sa inyo’ng yuta ug ang tawo nga nakapalit niini. Ang tumong niini aron kamo mag-areglo ug ma-settle ang inyong problema. Kun dili g’yud kamo mahusay sa barangay, ang sunod ninyo’ng buhaton mao ang pagpasaka og kaso ngadto sa korte ug kinahanglan nga imong andamon ang ebidensya pagmatuod nga ilang nalapas ang inyong yuta. Mas maayo ‘sab nga moduol ka og abogado aron iyang matun-an ang imong kaso sa dili ka pa mopasaka niini ngadto sa korte. Kun mapamatud- an sa korte nga milapas siya, hayan ma-invalid ang iyang pagbaligya ug makabayad siya kaninyo tungod sa danyos nga iyang nahimo ilabi na sa iyang pagputol sa kahoy. - Atty. Divine
Alang sa inyong pangutana ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules ug Domingo.