Pormal na nga buksan ugma’ng adlawa ang atong pag-obserbar sa Fire Prevention Month 2015.
Ang tema karong tuiga mao ang “Kaligtasan sa Sunog: Alamin, Gawin at Isabuhay Natin.”
Pagabuksan ang tibook buwan nga kalihukan pinaagi sa “unity walk for a fire-free and fire-safe society.”
Ang mga mosalmot sa unity walk adto manukad paglakaw sa rehiyonal nga buhatan sa Bureau of Fire Protection (BFP)-7 ug mopaingon sa Fuente Osmeña Circle.
Gikan sa Fuente Osmeña Rotunda ang mga mosalmot sa unity walk mosubay sa dalan B.Rodriguez, moliko sa wala subay sa V. Rama Avenue ug moliko na usab sa wala pag-abot sa N. Bacalso Avenue, balik na sa BFP-7 Compound.
Ang unity walk pagasalmotan sa mga estudyante, maestra, mga sakop sa Non-Government Organization (NGO), lainlaing government agencies, kawani sa mga Local Government Units (LGU) ug mga volunteer fire brigades ug sa mga kawani sa BFP.
Ang tumong sa pagpahigayon og unity walk mao ang pagpakaylap sa kasayuran ngadto sa publiko sa kamahinungdanon sa fire prevention campaign.
Kadto’ng buot moapil, ayaw kamo kataha sa pag-adto sa among rehiyonal nga buhatan kay magsugod ang paglakaw sa alas 5:30 sa buntag.
* * *
Daghan ang mahibulong kun ngano nga mosiaw man hinuon ang mga sunog atol sa pag-obserbar sa Fire Prevention Month. Ang rason niini mao nga init kaayo niini’ng panahona. Usahay daghan ang magpataka lang sa pag-itsa sa ilang mga nagbaga pa nga upos sa sigarilyo ug mao nga dali ra kaayo makapadukot sa mga laya nga mga sagbot.
Angay gayud kita nga magmatngon aron makalikay kita nga mabiktima sa sunog.