EDITORYAL – Siguroa nga makabaligya

Aprobado na ang kapin sa P13 Bilyones nga budget sa dakbayan sa Sugbo para karong sunod tuig. Apan wala gihapon kini kapuslanan kun si Mayor Michael Rama dili makabaligya og yuta diha sa South Road Properties.

Tataw kaayo sa Budget Ordinance nga giaprobahan sa Cebu City Council kagahapon nga ang mga proyekto’ng inprastraktura nga kantidad og P4.5 Bilyones dili kini ikapatuman hangtud nga si Mayor Rama makabaligya og yuta.

Husto ang gihimo sa City Council kay dili angay’ng unahon ang pagpatukod og mga building kay mas mahinungdanon ang ubang serbisyo nga kapahimuslan g’yud dayon sa kinabag-ang katawhan.

Kun napakyas ang administrasyon ni Mayor Rama sa pagkolekta og P13 Bilyones aron suportahan ang budget para sunod tuig hayan nga gamiton kini sa iyang mga kontra sa politika kun si Rama magpapili pag-usab pagka mayor sa sunod eleksyon.

Busa kinahanglan nga karon pa lang daan lig-onon na ni Mayor Rama ang iyang mga paagi kun unsaon niya sa pagpalambo ang pagpangolekta og buhis.