Kitang tanan kabahin na sa atong pagkatawo ang pagkamausabon. Mao kini ang maghatag kanato'g higayon nga kun sa atong panghunahuna, aduna kita'y naamgohan nga angay nga usbon para mapatunhay ang atong kaugalingon. Lainlain ang mga situwasyon diha sa atong pagkatawo, nga unsa may gimatuto kanato unya inig ka hamtong, natural lang nga gamiton ang sentido kumon kun kini maghatag ba kanato og kaayohan o kalamboan.
Matud sa mga eksperto sa katilingbanong kalihokan, ang kausaban maoy gikinahanglan kun may buot kitang himuon nga iuswag ug i-angan-angan para maihaom o mosigo sa atong tinguhaong pangandoy. Sama nimo, sila usab may buhatong kausaban kun makita nga way kahimoan ang kaugalingon nila.
Di dautan ang kausaban kun may tsansa nga makatabang kini di lang sa kaugalingon. Kun dili ibalanse usab ang kaangayan nga epektibo ikaw sa pakig-alayon aron makab-ot mong katabangan ka usab nilang magmalampuson ka. Atong aninawon pag-ayo nga ang pag-usab itumong gayud sa katarong ug ayaw kanang negatibong kausaban nga makadismaya kanimo sa palaabuton.
Ang kausaban, imong isentro sa kahibalo nga di pinasagad ang disisyon. Nakatumong gayud subay sa pagkoreher sa imong kongkretong plano nga sagupon.
Ayaw isalig sa paglangan nga maapsan ka sa paglaom nga maluya nga di nakapadayon. Maiwakli ka sa uban nga nagmaya sa ilang kalamposan.
Kun motalaw ka sa pagbag-o alang sa imong kausaban, susama ra nga di ka buot tabangan ang kaugalingon, nga mosakripisyo ka nga ipahimutang diha sa mga oportunidad nga nakataganang dawaton ang ganti sa imong pagbag-o.