Bisan sa kagamay na sa gidaghanon sa komunistang New People’s Army itandi sa ubang rebeldeng grupo nga nag-alsa batok sa gobiyerno, ang NPA maoy dunay labing daghan og pagpangatake nga gihimo ug maoy kinadaghanan og napatay.
Sa bag-ohay lang gipagawas nga Global Peace Index karong tuiga, ang Pilipinas ika-siyam sa kalibotan nga dunay grabeng problema sa terorismo ug nag-una sa tibuok Southeast Asia.
Dinhi sa Pilipinas, dunay Moro Islamic Liberation Front, Moro National Liberation Front, maayo na lang nga aduna nay panagsabot-kalinaw tali sa gobiyerno ug ingon man ang NPA.
Sunod kanila ang gibansagan sa militar nga terrorist groups (lakip ang NPA), ang Bangsamoro Islamic Freedom Fighters, Abu Sayyaf terrorist gang, Rajah Sulaiman Movement ug uban pang mga sub-groups nga pulos dunay kapabilidad pagpangatake.
Ang MILF, MNLF, BIFF, ASG, RSM ug uban pang sub-groups pulos nagbase ug nag-operate sa Mindanao lamang.
Ang BIFF gustong ipadayon ang tinguha kaniadto sa MNLF ug MILF pagbuwag sa Mindanao gikan sa Pilipinas, samtang ang ASG gihimong negosyo ang kidnapping ug pagpamunggot og ulo, ang RSM terorismo usab ang katuyoan.
Apan sa tanan, ang NPA mao hinuoy dunay dakong kadaot nga nahimo. Kini tungod kay hapit tanang dagkong probinsya adunay NPA, ilabi na sa mga lugar diin duna pay daghang mga tawo nga wala maabot sa serbisyo sa gobiyerno.
Managlahi man ang ilang mga baruganan, apan sa mata sa international community, pagsamoksamok lang ang ilang gipanghimo ug duna kini epekto sa kalamboan sa nasud.
Mas maayong pakusgan pa sa gobiyerno ang civil military operations niini tungod kay kung basehan ang GPI 2014, kuwang pa g’yud ang gibuhat niini.