Walay kukahadlok si Dr. Paulus Cañete nga mipasulbong sa balita nga nangandam na siya paglansar pagka mayor sa Mandaue City sa piniliay karong 2016.
Wala pa mohisgot sa iyang bise mayor apan may lig-on siya’ng suporta gikan sa mga pamilya’ng Cañete, Mendoza, ug sa ubang grupo sa katawhan ilabi na sa mga pamilya sa mga estudyante sa Mandaue City College.
Ang iyang pagpangandam karon alang sa sangka’ng lugaynon sa umaabot nga eleksyon maoy dako’ng timaan nga ang usa ka academian gusto na nga mosubay sa dalan sa politika aron makasilbi pa g’yud sa kadaghanan.
Sa kasaysayan sa Mandaue wala pay professor nga nagdumala og kaugalingon’g eskuylahan nga nahimo’ng mayor, busa gikan sa pag-umol sa utok sa kabataan ug mga professional, gusto ni Cañete nga ang hiyas sa pagdumala ning mga grupoha, ikapamahin niya sa katawhan sa Mandaue.
May kaugalingon na usab siya nga estasyonan sa radio - ang DYPC-FM (PC-Paulus Cañete) nga motabang sa gipasiugdahan niya’ng “Ako Medya” Party List group.
Wala pa siya mokonpirmar kun usa ba siya sa mo-representar niini sa kongreso, apan mopatawag siya og konbensyon sa tanang sakop sa media sa Cebu aron magpili og mga mahimo’ng representante sa Ako Medya sa kongreso gikan sa radio, newspaper ug telebisyon.
* * *
Congratulations kang Ursula Lobrigas, Noli Boy Garbo ug Retzel Armero, mga gradwado sa Mandaue City College ug mipasar sa Licensure Examination for Teachers. (wencelen@yahoo.com)