Duha na lang ka adlaw og mao na ang deadline sa pagsumiter sa kopya sa Annual Executive Budget ngadto sa mga legislative bodies sa lainlaing Local Government Units (LGU’s).
Sigurado nga si Mayor Michael Rama dinhi sa dakbayan sa Sugbo mosumiter g’yud og dako nga budget alang sa operational expenses karong sunod tuig. Kun pila, wala pa’y nasayod gawas sa mayor ug sa mga nag-andam sa budget.
Gipasalig ni Konsehal Margarita “Margot” Osmeña, ang nagpabilin nga pangulo sa Budget and Finance Committee sa City Council, nga dili nila supakon ang dako nga budget nga isumiter sa mayor.
Apan kinahanglan nga maklaro sa mga opisyal sa executive department, ilabi na sa mga sakop sa Local Finance Committee, nga ang kantidad sa budget nga gisugyot makolekta g’yud.
Sigurado nga iapil sa Local Finance Committee pagsuporta isip “sources of funds” ang halinon unya sa 45 hektareyas nga yuta sa South Road Properties (SRP) nga buot ibaligya ni Mayor Rama, apan hangtod karon wala pa’y mipadayag g’yud nga mopalit sa maong yuta.
Apil sa basihan sa budget and finance committee sa ilang pagtuki sa isugyot nga budget para sa sunod tuig mao ang koleksyon sa dakbayan gikan niadto’ng Enero hangtod karon.
Kay base sa giaprobahan nga Annual Budget karong tuiga nga P5.8 Bilyon, ang dakbayan nakakolekta pa lang og subra’g gamay sa P4 bilyones. Kini apil na sa mga nadawat nga bayad sa nangahalin nga yuta ug sa Internal Revenue Allotment.
Kun kini ang basehan, maaninaw na’ng daan nga dili maayo ang pagpangolekta sa buhis dinhi sa dakbayan. Kini tataw kaayo nga makaapekto sa isugyot nga budget ni Mayor Rama.