Naalirongan karon og mga armadong mga rebeldeng Syrian ang 75 ka mga Filipino Peacekeepers nga nagbantay sa Golan Heights, ang dapit nga nag-ulang sa nasud sa Israel ug Syria nga gihimong “buffer zone” tali sa duha ka mga nasud.
Ang kagubot sa Middle East dako nang hulga sa seguridad sa kalibotan tungod kay nanganak kini og radikalismo, extremists, ug terorismo.
Matud pa sa report, ang mga Filipino peacekeepers armado lamang og light machineguns apan kargado sa kaisog ug wa mosugot sa demanda kanila pag-surrender sa ilang mga armas.
Nangandam sila karon sa posibleng pag-atake kanila sa mga Syrians, tungod kay 40 nila ka mga kaubang Fijian peacekeepers ang gi-hostage usab sa mga rebelde dihang mituman sila pag-surrender sa ilang mga armas.
Mao kini nga mga senaryo ang gilikayan sa Department of National Defense nunot sa plano na untang pag-pullout sa mga Filipino peacekeepers gikan sa Golan Heights.
Bisan ang bandila sa United Nations dili na makagarantiya nga di hilabtan ang mga peacekeepers. Ang kondisyon sa Pilipinas ngadto sa UN, hatagan kini og hustong mga gamit alang sa ilang proteksyon.
Niadtong milabay’ng tuig, 25 ka mga Filipino peacekeepers ang gisignit sa mga rebeldeng Syrians, hinuon human sa negosasyon gibuhian ra sila. Apan nagbilin kini og leksyon sa UN ug sa mga Filipino didto.
Pinaagi sa mga sundalong Filipino nga nagserbisyo sa abroad, nailhan ang Pilipinas ug usa kini sa labing daghan og sundalo nga na-contribute sa peacekeeping missions sa UN.