Duna nay nasang-at nga impeachment complaint batok kang Presidente Benigno Aquino III nga giendorsar sa tulo ka militanteng kongresista gikan sa 28 ka nagkalain-laing cause-oriented groups nga mipasiatab nga dunay mga ebidensya nga angayang palagputon ang pangulo sa pwesto.
Sama sa ilang pagsuway apan napakyas nga impeachment complaints batok ni kanhi presidente Gloria Macapagal Arroyo, “culpable violation of the Constitution” gihapon ang ilang nakitang rason batok kang Aquino.
Kun kaniadto nga pagpanikas, kurapsyon sama sa ZTE Broadband deal ug uban pa ang gipasangil kang Arroyo, karon ang rason sa nagduso sa impeachment ni Aquino mao ang Disbursement Acceleration Program (DAP) kay matud pa ilegal ang paggamit niini sa presidente.
Ang maong mga kasikas sa mga politiko pagpakita lang sa kahimsog sa demokrasya sa nasud. Dili lang unta kini magbunga og bati nga epekto sa ekonomiya, seguridad ug kagawasan sa katawhan.
Tungod kay namatud-an na man nga ang bisan unsang kagubot kun ang tumong mao ang pagpatumba sa gobiyerno sa usa ka nasud, wala kini nahatag nga kaayohan sa tanan.
Ang importante, ipaagi sa tanang habig sa legal nga proseso ang pagkab-ot sa ilang tinguha ug dili mogamit og pwersa aron di mapagan ang tanan.
Hinuon sa pagkakaron, nag-enjoy pa gihapon si Aquino sa suporta sa tanang ahensya sa gobiyerno ilabi na sa kapolisan ug militar nga usa sa mga nakabenepisyo sa DAP.
Kun dunay sala si Aquino, dunay proseso nga angay sundon. Basta ang tanang habig maghuna-huna lang gyud nga ang kaayohan o “common good” sa tanan maoy unang ibutang sa listahan ug dili ang ilang mga personal nga katuyoan.