Ang tawo kung mabutang sa peligro ang kinabuhi posibleng mausab ang huna-huna. Kini maoy posibleng hinungdan kun nganong nausab ang baruganan karon sa negosyanteng si Janet Lim-Napoles.
Si Napoles gipailawom sa operasyon niadtong Martes tungod sa cyst sa iyang uterus. Miagi siya og usa ka medical procedure nga magbutang sa peligro sa iyang kinabuhi.
Wa siya malisang sa pagpanghadlok kaniya ni Senadora Miriam Defensor Santiago nga klaro kaayong ang target nga mobali siya ug itudlo ang numero uno niining kaaway sa Senado nga si Senador Juan Ponce Enrile isip maoy 'mastermind' sa maong pagpangawkaw sa kaban sa katawhan.
Apan sa operasyon nga iyang giagian klaro gyud kaayo, nga dunay mga risgo ug kini gibati si Napoles maong miinsister siyang pakigkitaan ug tug-anan si Justice Secretary Leila de Lima niadtong Martes.
Matud pa nga gusto nang "mokanta" ni Napoles kabahin sa P10 bilyones nga pork barrel scam ug gipanganlan sila si Enrile, Senador Jinggoy Estrada ug Senador Ramon Bong Revilla Jr. sa maong pagpangawkaw.
Ang tulo nga gipangalanan napasakaan na og sumbong, wa nay bag-o niini. Apan kun ang unod sa mga impormasyon unya ang iyagyag maoy hisgutan, lahi na kini nga estorya.
Gusto na ba gyud niyang mamahimong state witness? Nindot kini nga proposisyon gikan sa gipasanginlang maoy 'mastermind' sa scam. Nagpasabot ba kini nga tinuod ang pagduda ni Santiago? Daghan pang teknikalidad nga agian kun tinud-on ang pagkuha kaniyang state witness, apan angayang timbang-timbangon sa justice department kun asa’y mas makaayo sa estado.
Kun ang mga testimonya ni Napoles maghubo sa maskara sa mga nagpaluyo niini, angayan sigurong tugotan si Napoles nga mahimong state witness. Kung mangahulogan kining mataral sa hukmanan ang tinud-anay nga sad-an, nganong dili man?