Tingali kadaghan kanang kadungog aning pulonga nga ‘Think Positive’. Nindot kaayo ning pamation kay lagi mao may atong gituhoan nga kini makahupay sa situwasyon kun moabot ang pagkaluya sa atong paglaum. Maapektahan ang normal tang kabuot. Kanunay lang ta saputon, masuko bisa’g way hinungdan, kay naa kanunay sa hunahuna nga ang tanan mong panlantaw, mahulog na lang sa way kapuslanan. Motalaw ug maduhaduhaon nga wala nay pagsalig sa kaugalingon. Mahadlok na nga morisgo sa pagdawat sa kapakyasan.
Dili usikan ang higayon, tungod kay taas na kaayo ang panahon nga atong gipuhunan ang pag-antus. Duol na ang katapusang ang-ang sa pagsulay. Hapit mo na sugdan ang lakang paingon sa katumanan. Lugwaye pa ang pailob, hangtud nga ang bationg kasakit, maalid-an na sa kalipay. Sulaye ning mga giya aron matutokan ang positibong panan-aw sa imong pakigbisog sa kinabuhi.
• Ayaw pakig-uban sa mga tawo nga kanunay lang negatibo ang panghunahuna, kay ma-impluwensiyahan ka nila. Maoy suora kadtong mga malaumon sa kinabuhi nga kakuhaan nimo’g ehemplo o ideya, aron mahisama kanila nga masingkamoton ug mainantuson, hangtud modaug.
• Buhata kanunay ang pagbasa og mga makapadasig o inspirasyonal quotes, ug mga verso ilabi na kanang gikan sa bala-ang basahon o bibliya.
• Kun may kauban kang nawad-an sa paglaum, tabangan mo nga mapalig-on kay sama ra kini nga gilig-on mo usab ang imong kaugalingon.
• Aron dili ka daugon sa kasagmuyo, lingawa ang kaugalingon sa pagpaminaw sa makalingaw o makapahimuot nga huni sa mga musika.
• Ipahayag permi ang positibong ekspresyon sa imong panagway, kay kini motakod sad sa uban nga mahimong mapositibo sa ilang panan-aw.
• Mapahiyumon kanunay bisag puno ka sa mga mabug-at nga suliran, makapagaan kini sa imong gipas-an og sayon makita ang kasulbaran.
• Ipamahin ang naangkon mong kahigayonan ug katigayonan, kay makalipay kining buhata nga mopadasig ug mopataas sa kompiyansa o lebel sa imong positibong panan-aw.