Nagduka nga mga opisyal

Paspas na kaayo ang pagtukod og kabalayan sa nasunogan nga bahin sa Barangay Lorega-San Miguel.

Mata’g agi nako sa mao nga dapit, mohunong g’yud ko ug mogawas sa akong sakyanan aron pag-aninaw sa palibot. Wala na sila makaila kanako nga kaniadto nagpuyo usab sa Lorega-San Miguel.

Maayo unta og dili makalimtan sa mga molupyo ang leksyon nga ilang nakuha atol sa sunog nga miugdaw sa ilang kabalayan kaniadtong Marso 18.

Kadtong mao nga sunog mahimo unta nga matabang sa mga bombero kun aduna pa’y “access road” nga kaagian sa mga fire trucks.

Unsaon, aduna unta’y karsada nga nahimutang luyo sa karaan nga ihawan gitukoran man og mga tindahan sa mga mapahimuslanon sa higayon unya ang mga opisyal sa barangay daw natulog lang.

Kun gituman pa sa mga opisyal ang ilang katungdanan tingali mapawong ra ug dili makadako pagsilaob ang sunog. Maayo unta og makakat-on na og leksyon ang mga opisyal sa Lorega-San Miguel.

Karon nga gibutangan na gayud og karsada ang mao nga dapit, bantayi g’yud ninyo nga kadtong anaa sa daplin makakuha og luna dili sila moabuso.

Pananglit palapdan ra gihapon sa uban ang ilang panimalay ug ipaabot sa karsada ang ilang balay unya maghinan-aw lang kamo, unya matulog ra usab ang inyong mga opisyal, aw tingali makakat-on ra gihapon kamo og lain nga leksyon sa umaabot.

Ayaw kamo kahadlok sa pagreklamo kun adunay inyong mga silingan nga moabuso. Apan balikon nako, kun ang mga opisyal molihok lang g’yud, malikayan g’yud ang katalagman.

Pareho niana’ng gamay kaayo nga karsada nga paingon sa Sitio Kaimito, sakop gihapon sa Lorega-San Miguel ug nahimutang atbang ra g’yud sa barangay hall, pwerte na g’yud nga gamaya.

Siyaro na man ‘sab og si Kapitan Fritzgerald Hererra wala makakita niana. Kun may sunog didto sa Sitio Kaimito nga didto ko nagpuyo kaniadto, walay trak sa bombero nga mosulod kay masangit ang ilang sakyanan.

Sa ako na nga giingon, ang nindot nga modumala unta sa kagamhanan mao kadtong mga tawo nga dili mahadlok mapilde sa sunod nga eleksyon basta mapakita lang niya sa katawhan kun unsa’y husto ug unsa’y sayop.

Apan kay ang katawhan man sa Lorega-San Miguel ang nagpili sa ilang mga opisyal, basin og nakagusto ra sila nga ingon niana nga matang sa pagdumala.

Dili hinoon monopoliya sa Lorega ang problema kay sa ubang kabarangayan ang ilang mga opisyal naghinan-aw lang usab sa mga tag-iya og kabalayan nga mipalapad sa ilang teritoryo ngadto na sa karsada.