Daghan pa ang wala sa People Power

Adunay mga nag-ingon nga daghan sa mga batan-on karon nga wala pa gayod mahingpit ang ilang pagsabot sa makasaysayanong panghitabo sa EDSA  People Power   sa Pebrero 25, 1986 nga maoy hinungdan sa panginahanglan karon sa pagsabwag og tukmang kasayuran alang sa kinatibuk-ang katilingban.

Nunot niini adunay moingon nga dili usab mabasol ang mga batan-on kun nahimo silang kuwang sa kasayuran kay wala pa man usab sila ikahimugso sa kalibotan  ug ang gagmay pang mga bata niadtong panahona labaw na nga dili sila mabasol kay wala pa man usab sila sa hustong kabuot alang sa pagsabot sa politika ug ekonomikanhong kahimtang.

Dugang pa nila nga dihang nahitabo ang People Power 1 Revolution sa EDSA  daghan pa gayod ang wala kun itandi karong panahona nga anaa na sa ika-28 ka tuig nga  kasaulogan nga dili lang karon makita ug mahikap kun dili mao na gayod nga gigamit.

Sa pag-ila sa mga wala pa niadtong panahon nga nahitabo ang EDSA People Power 1 nga gipangulohan nila na kanhi Presidente Fidel V. Ramos, Senador Juan Ponce Enrile ug kanhi Senador Gregotio Honasan uban sa bagang duot sa katawhang Pilipinhon mao  ang pagamit sa computer ug tataw usab nga niadtong panahona  wala pa usab ang  internet, ang facebook  kay ang kasagaran sa gigamit kaniadto mao man ang typewriter. Wala pa ang cellphone ug tataw usab nga wala niadtong panahon sa EDSA People Power I nga wala ang text messages, wala pa ang mobile phone kay ang telepono nga gigamit nga kumunikasyon  bisan sa kalungsoran sa lalawigan nga panagsa pa ang telepono mahimo man tuod nga makatawag apan long  distance ang kuwentada sa  balayranan.

Dugang wala pa kaniadto sa panahon sa EDSA People Power I mao ang dagkong patigayon karong panahona sama sa mga mall, mga pabrika nga maoy hinungdan nga daghan ang mga Pilipino kaniadto ang walay trabaho ug kun may trabaho man ugaling gagmay usab ang gidawat nga matag adlaw niining suweldo.

Hinuon bisan tinuod kaniadto nga daghan ang walay trabaho ug gagmay ang gidawat nga matag adlaw nga suweldo apan barato pa hinuon niadtong panahona ang kantidad sa mga nag-unang palaliton sama sa bugas, mantika, sardinas, isda ug lakip na ang minimum nga plitihan sa mga sakyanan.