Wala’y hunong ang reklamo sa mga mabuot nga katawhan sa padayong pagkyugpos lang sa kapolisan ug mga traffic enforcers nga gipasagdan ra ang mga drayber nga dili mopasiga sa suga samtang magmaneho’g sakyanan sa gabii.
Wala malilong niining mao nga mga road law enforcers nga kalapasan sa balaud ang pagmaneho og sakyanan lapas sa pagsawop sa adlaw nga dili mopasiga sa suga apan gipasagdan ra nila ang binuang sa mga drayber.
Daghang drayber nga ang nahibaw-an mao ra gayud ang pagpadagan sa sakyanan nagtuo nga kalas sa gasolina ingon man dali nga maguba ang batereya sa sakyanan kun sila kanunay nga magpasiga sa suga.
Tungod sa pagkyugpos lang sa mga tigpatuman sa balaud diha sa mga karsada, nabutang sa peligro ang kinabuhi sa daghang mga tawo, ilabi na kadtong mga halap na og panan-aw nga hayan madam-agan kun mutabok sila sa karsada.
Lahi na kaayo ang PNP Highway Patrol Group ug Traffic Group karong panahona kun itandi kaniadto nga kanunay’ng mohimo’g Oplan Kilum-kilum aron dakpon ang mga badlungon nga drayber.
Daku kining hagit ni Chief Superintendent Danilo Constantino nga isip labaw’ng opisyal sa kapolisan dinhi sa Central Visayas, mandoan niya ang iyang mga sakop nga ipatuman ang balaud.