Ayaw pugsa

Dear Tito Miguel,

Ako diay si Nerisa, taga Labangon, Cebu City. Ang problema nako karon ba kay dili kaayo hinagad ang akong uyab ngadto sa akong mga friends. Kun molaag mi sa akong friends,dili gyud siya mouban. Gusto niya nga kun laag gani, dapat kami rang duha. Unsa man ang angayan nako buhaton Tito Miguel? Makaingon ko, ka-OA sad aning uyaba, bisan unsaon nako og kumbinser, dili gyud maminaw. —NERISA

Nerisa,

Ang tawo nga mauwawon, dili angay usbon. Lagmit mao gyud na iya pagkatawo, ang pag- usab dili ipamugos nimo. Gani natural ug komon kini nga pamatasan sa nagkadaiyang kultura sa kalibotan.

Pasagdi kun asa siya kumportable, kay dili sab makiangayon nga sa pagkuyog sa imong mga higala imo siyang pugson. Ang pagtugot kinsa iyang kuyogan naa niya. Sama ra gud nimo nga hingamigo, imo sad nang pagkatawo, dili sab siya angay moreklamo.

Gani, pagpasalamat nga ganahan siya kamo rang duha, pribado ug suod. Di pa ka ana, makapatuyang ka’g lingaw kuyog imong mga higala, walay maniid o mamadlong kanimo. Kun imo siyang pugson, di gihapon ka malipay, maguol ka kun siya nalingaw o namingaw.

Apan kun ultimo pagtimbaya ug pagtagad sa imong mga higala dili siya, kana ang problema. Mogawas nga siya bastos ug maot. Agniha nga motimbaya ug mopahiyom. Dili kinahanglan makig-istorya’g dugay, igo na ang hi, hello, goodbye. Kun pangutan-on, tubag sa tarong. Kun dili, puede ra siya mohilom. Apan kinahanglan maminaw gihapon, aron sa grupo siya konektado maski iyang baba kandado. Mao nay insakto nga pamatasan.

Pasabta nga sa imong barkada angay siya makisama, kay samtang kuyog ka nila, sila ang mag-atiman o moprotektar nimo kun dunay kakulian. Sama nga angay siya morespeto sa pamilya nimo, kay sila imong sandiganan kun kinahanglan. Hinay-hinaya lang, dili kinahanglan isagol imong uyab ug barkada. Uyab ka niya, amiga ka nila, lain-lain nga kalibotan. Gani, suwerte ka, siya mauwawon, dili presko ug hambugero. Tito Miguel

Magpatambag ka? Ipada kang Tito Miguel: 0998-581-5856