Dear Tito Miguel,
Magpatambag unta ko nimo. Ako live-in tua sa Mindanao, dugay na siya wala uli diri Cebu. Naa mi anak usa, lake. Sulti niya naa siya'y kaipon didto. Iyang edad 45, ako 34. Sakitan ko sa iyang gibuhat kay kalit kaayo. Sige ko'g padala kwarta, unya naa diay kaipon didto. Unsa may tambag nimo nako, Tito? —Marlon
Marlon,
Depende sa imong plano ug gusto. Kun gusto ka magkauli mo, kalimti imong plano. Tinuod sakit kay kalit kaayo. Gani sakit gihapon maski gihinay-hinay ka’g budhi. Lagmit gani dili kay karon lang na niya gibuhat, dugay na nga panahon apan karon lang siya niangkon. Buot pasabot dili pa lig-on ug lawom iyang gugma kanimo, kay ngano nakig-ipon siya’g lain tungod lang kay layo siya nimo. Malayo o maduol ang tiunay nga gugma dili mahugno. Busa ayaw siya daginota. Dawata nga niabot na mo sa utlanan. Tinuod sayon isulti, lisod buhaton. Wala kay laing mahimo kun dili ang pagdawat sa inyong gidangatan. Pasagdi ang panahon nga maoy mopahikalimot nimo. Bata pa ka, ablihi imong kaugalingon nga makakita’g lain nga kanimo matinud-anon sa layo ug duol. Kun imong pangutana unsay buhaton sa inyong anak, kinahanglan ninyo sabotan ang kustodiya, pagduaw ug sustento. Wala ka maghisgot pila’y edad sa bata. Kay kun ubos sa siete anyos, ngadto gyud na sa inahan gawas kun siya walay katakos sama sa nawad-ag kabuot o bisyoso. Dangop sa abugado aron ka matambagan sa insakto.
Tingali naghunahuna ka undangon ang sustento kay naa na siya’y laing kapuyo. Ipadayon gihapon kay imo nang responsibilidad. Apan subay kini sa imong katakos ug panginahanglan sa bata. Basin nahadlok ka nga ang iyang kapuyo maoy makatagamtam, padala’g kantidad nga para sa bata lamang. Angay magpikas mo sa inahan sa gasto, inyo nang obligasyon duha. Apan timan-i sa kinabuhi dili na nimo siya kapikas. Busa kaniya lingkawas. —Tito Miguel
Magpatambag ka? Ipada kang Tito Miguel: 0998-581-5856