Miguel
Dear Tito Miguel,
Ako si Diony, single ug kasamtangan’g ania sa lain’g nasud. Angkunon ko nga nindot naman ang ako’ng trabaho diha sa ato sa Pilipinas apan kay buot man kong mosuway og laing kinabuhi nga dugay na nako’ng gipangandoy. Lima ka buwan nako dinhi ug naka-adjust na bisan og layo sa pamilya ug mga higala. Kon sweldo ang hisgutan, sakto ra bisan og daghan ko’ng gibayran nga loan aron ko makaanhi.
Niadtong miaging adlaw, gisuna ko sa ako’ng amo dinhi kon morenew ba ko o dili. Nagduhaduha pa ko nga morenew kay nagpaabot sab ang ako’ng former employer diha’s Pinas sa ako’ng desisyon kon mobalik ba ko ilabi na nga nanginahanglan pa sila sa akong serbisyo ug wala pa silay makita nga makapuli niini. Ang suliran nako karon mao ang pagpili; ang pagpadayon sa dugay na nako’ng gipangandoy aron mapalambo pa ang akong kaugalingon o ang pagtrabaho nga adunay purpose diha sa ato?
Maanugnan ko sa mga opurtunidad ug kasinatian nga gitanyag sa duha ka trabaho maong naglibog pa karon. Nagsige gyud kog pangayo og mga signs gikan sa kahitas-an aron ko malamdagan. Hinaut malamdagan usab ko nimo Tito Miguel.
Diony
* * *
Diony,
Happy problem. Dili ka angay maguol sa imong suliran, igo ra ka mopili asa sa duha ka oportunidad ang kanimo angayan, samtang ang kasagaran bisa’g usa ka panginabuhian wa’y nakaplagan.
Kun minyo pa unta ka nga duna’y mga anak ug susama ra ang suweldo, abtik ko motambag nga pauli kay dili mabayran og salapi ang sa pamilya mahilayo. Apan kay single man ka, mahimo nimong ipadayon ang panrabaho diha kay duna pa ka’y bayronon aron lang makaanha.
Kun mopauli ka, mahulog nga diri ka manrabaho aron mobayad sa utang para dinha sa gawas manimpalad. Simang imong mga lakang, duna’y dakong kahiwian. Hinumdomi unsa imong tuyo diha, dili ba ang pagkab-ot sa kinabuhi nga imong gidamgo? Hatagi’g higayon imong kaugalingon nga sa laing nasud magmalampuson. Minilyon ang nangandoy maangkon imong kasamtangang sitwasyon. Anugon, busa ipadayon ang imong nasugdan hangtud maimpas imong mga kumpromiso aron lang sa gawas ikaw mangempleyo. Inig human sa imong bayronon ug duna na ka’y igong natigum, libre na ka mohukom. Kun imong trabaho diri naa pa gihapon, lagmit gitadhana gyud asa ka paingon. Apan posible inig abot sa panahon ikaw na mismo magdumili’g pauli.
Ang nakapaagni nimo diha kay mas dako ang suweldo, apan gusto ka mobalik sa mahinungdanong trabaho. Sa kalisud sa panahon karon, ang salapi lehitimo nga katuyoan kun sa kaligdong gipasingotan. Earn first, passion next. Work for financial growth, so you can do both.
Tito Miguel
* * *
Alang sa inyong mga suliran nga buot ninyong patambagan kang Tito Miguel, -i-like ang Banat Hugyaw ug Banat News fb pages aron adto ninyo kana ipadala ug mogawas kini matag Lunes ug Biyernes.