Dear Tito Miguel,
Ako si Rosemarie, 35 years old ug minyo na. Tulo mi ka magsuon. Patay na among papa human nasakit sa nilabay’ng tuig. Ug dinhi nagsugod among problemang managsuon kay mga pila lang ka bulan naka-uyab among mama og batan-on. Fifty-six years old na akong mama ug ang iyang uyab 29 anyos, walay trabaho ug buwag sa kapuyo pero dunay anak nga toa sa babaye. Akong mama namaligyag alahas ug nagpatanto og kwarta. Real estate agent sab siya.
Una sa tanan, supak gyud ming magsuon kay bag-o pa tawon namatay among papa. Ikaduha, klaro man gyud nga nagpabuhi na sa among mama kay wala man nay trabaho apan daghan man og luho. Ang nakaparat pa kay nakadungog mi nga naay iring-iring nga dancer ang maong lalaki. Silingan ra na namong lakiha.
Kun istoryahan namo among mama, dili man maminaw kay gidaot lang kuno namo iyang laki. Kami na nuon maoy mahimong dautan ug magkagubot lang mi sa amoa. Ambot uy gilumay man tingali among mama kay pilit man gyud siya anang lakiha, di man gwapo unta, potot pa gyud. Unsaon man ni namo among mama, Tito Miguel? —Rosemarie
Rosemarie,
Ayaw sugata inyong inahan, sigurado kamo mabanggaan, nabuta pa siya sa iyang kalingawan. Sa inyong pagdumili, samot sa lalaki ngadto mopilit. Ang tawo kun imong but-an sa gusto, samot mokisi-kisi mabuhat lamang iyang bisyo.
Ipasalig sa inyong inahan nga dili mo supak sa iyang nakaplagan, apan tambagi siya nga magmatngon, dili sagola’g kuwarta iyang relasyon aron masusi kun ang batan-on magpabilin ba gihapon.
Ayaw isulti sa inyong nahibaw-an sa pagkatawo sa lalaki kun wala’y igong ebidensya. Inyong inahan di maminaw sa inyong mga notisya. Buta, bungol ug amang, sa batan-on siya nagsalimuang.
Ang lalaki ang angay ninyo istoryahon, nga supak unta mo niya, apan kay gipili man siya sa inyong inahan, inyo siyang dawaton. Sa usa ka kundisyon, iyang dili maayong binuhatan undangon. Pero lagmit sa inyong inahan mosumbong ug kamo na say kontrahon.
Pasagdi, basta gibuhat ninyo tanang pahimangno aron ilang relasyon sa tarong mahimutang. Inig abot sa panahon nga inyong inahan makaamgo, wala’y lain basulon kun dili iyang kaugalingong damgo.
Dili kini tungod sa lumay, kun tinuod pa, hagbay rang naangkon sa tanan ilang gihinam-hinam. Ngano hangtud karon daghan man gihapon nangandoy apan wala makakab-ot kun puwede diay makuha sa lumay nga usa ra ka lad-ok?
Wala sa hitsura ang makalingaw sa tawo nga nag-inusara. Basin diha lang nakita sa inyong inahan ang makapuli sa kahaw-ang sa pagtaliwan sa inyong amahan. Basta wa mo magkulang sa pahimangno, pasagdi usa ninyo. Gani, siya unta ang mogiya ninyo ngadto sa insakto nga dalan, apan karon nabali ang kalibotan. Sagdi lang, ang matang sa relasyon nga iyang gikabuangan dunay utlanan.
Tito Miguel