Tito Miguel

Dear Tito Miguel,

Ako diay si Jhonston, taga Barangay Tisa, Cebu City.  Naa koy uyab karon, siya si Roisa nga taga Barangay Guadalupe. Duha ka tuig kapin na ang among relasyon  ug sama sa ubang manag-uyab nag-agi sad mi og mga away. Love kaayo nako si Roisa apan duna koy gamay nga suliran sa among relasyon karong panahona.

Maglagot ko maghuna-huna kay suod gihapon sila sa iyang ex-boyfriend. Usahay kun manglaag siya sa iyang barkada, naa pud ang iyang ex. Dili gyud bitaw ko mahimutang, magpatabang lang ko nimo Tito Miguel kun unsaon nako pagsulti si Roisa nga dili ko uyon sa ilang kasuod. Sakto ba ni akong gibuhat nga selosan nako ang iyang ex? Daghang salamat Tito Miguel sa paghatag og pagtagad sa akong suliran. — Jhonston

Jhonston,

Ang pakighigala sa ex usa ka healthy sign nga naka- move-on na ang imong uyab sa ilang kagahapon. Dili kini dautan labi na kun kuyog sa grupo. Apan ang problema karon kay nagselos ka ug dili mahimutang. Naglisud ka og padayag sa imong gibati niya.

Baliha ang sitwasyon aron dili siya ma defensive. Pangutan-a what if duna kay ex nga nagpabiling suod nga higala, ok ra ba niya? Kun moingon siya dili, ingna nga mao sad na imong gibati karon. Apan ayaw diktahi unsa iyang buhaton aron masukod nimo unsa ka importante imong feelings niya. Kay kun tiunay siya nagmahal kanimo, buhaton niya tanan aron di ka masakitan.

Kun mo ingon siya nga ok ra niya, dayega ang kalimpyo sa iyang hunahuna apan sultii gihapon nga dili ok sa imong bahin aron kahibawo siya asa molugar. Wala ka maghisgot nga magkuyog ba sila nga sila ra duha. If yes, then duna kini issue sa delicadeza. Maski purely friends ra sila, dili gihapon maayo tan-awon. Dinhi nimo masukod kun ni respetar ba siya nimo. Why be with her ex from the past now that she has you in the present?  Ang pagpangabubho gidiktahan sa pagbati, dili sa rason. Busa dili kini niya angay lalison. Instead, kinahanglan lang kini mahatagan og assurance nga dili mahitabo ang imong gikahadlokan. Never argue with feelings, just soothe them.

Karon kun dili siya makahatag nimo’g igong assurance or dili siya mo distansya sa iyang ex, panahon na nga imong sutaon asa ka dapit sa iyang kasingkasing. Apan kun dili ka makabiya niya maski magpabilin siya nga suod sa iyang ex, be her boyfriend and friend at the same time aron di siya mangita’g friend nga ex-boyfriend. Try to be both and see if she stays in your boat.—Tito Miguel