Love Story

Dear Banat News,

Maayong adlaw sa tanang suki nga  readers sa  Banat News. Permi gyud ko mag-atang sa LOVE STORY matag Martes. Ako diay si Larina, 27 years old  ug  nag-work isip  usa ka call center agent.

Dili kay ko komportable sa una nga mo-share sa akong past lovelife. Pero nakahunahuna  ko nga okay ra man diay dugay na bitaw to. Lima ka buwan nako nga walay uyab ug dugay sad ko nga  naka-move on. Happy ra man ko sa akong karon ug naka-focus ko og maayo sa akong trabaho.

Akong katapusang na uyab mao si NJ, 24 ug nag-eskwela sa usa ka unibersidad dinhi sa Cebu City og kursong HRM. Nagkaila mi ni NJ tungod kay nagkaabot mi sa usa ka youth activity sa usa ka NGO. Hangtud nga nagkasabay og jam sa among common friends ug didto nagsugod ang among kasuod. Maabot man gyud na sa punto nga magpangayoay og contact number unya gisundan dayon og mga date sa restaurant.

Manghod ra kaayo nako si NJ, maong dili malikayan nga ako gyud ang mo-adjust sa iyang pagkabata-bataon.

Sa  dihang nagkalawom ang among panag-ilhanay, ni diskarte dayon si NJ kanako  ug ako siyang gisugot kay nakita man sad nako ang grabe niya nga effort. Pag-abot og pipila ka buwan sa among relasyon, dunay rebelasyon si  NJ kanako.  

Grabe ang akong kakulba kun unsa kaha ang iyang isulti. Sa unang bahin sa among panag-estorya, nisulti siya nga love gyud ko niya nga bisan kinsa daw nga lalaki kay makagusto kanako tungod sa akong kabuotan ug pagkamasinabtanon.

Nahibulong ko sa gipanulti ni NJ ug wala koy ideya kun unsa ang direksyon sa iyang gipanulti.

Hangtud nga nihilak siya  ug nangayo og pasaylo kanako. Grabe gyud ang iyang paghilak ug makahibulong kaayo kun nganong nag-sorry siya nga wala man mi nag-away.

Sa pagpadayon sa among pag-estoryahanay, naabot gyud ang gikahadlokan nako nga adlaw nga mawala siya kanako.  Nidesisyon siya nga  magbuwag nami sakit daw para kaniya ang maong desisyon apan gikinahanglan kuno kaayo kay maoy gusto sa iyang ginikanan.

Didto niya gisulti ang dako nga rebelasyon.  Naa na  siya’y anak diay sa kanhi niya uyab.  Gi-pressure siya sa iyang ginikanan nga kinahanglan nga magbalik sila sa iyang ex aron dili magdako ang ilang anak nga walay amahan.

Sakit gyud para kanako nga magbuwag mi pero wala koy mahimo kay tibuok na gyud ang desisyon ni NJ. Dili daw siya kasupak sa iyang ginikanan.  Nagbaton ko og kalagot ni NJ kay wala niya gipaglaban ang among relasyon.  Naka-move on nako sa maong hitabo.  Dili pa ko andam nga maka-uyab og balik ug nag-enjoy ko sa akong pagka-single.  Mo-request na lang ko sa lyrics sa One Last Song by  A1.

Hi Larina! Thank you so much sa imong LOVE STORY! Paabuta ugma puhon ang imong request

Dear HUGYAWnatics, aduna ba kamo’y LOVE STORY? Suwata ka na ug ipadala pinaagi sa pag-like sa atong bag-ong Facebook Page: Banat News Hugyaw (BNH). I-like ang atong page daan, unya i-private message ang imong LOVE STORY. Ayaw lang i-abbreviate  aron matarong og basa.

Mahimo sab nga pinaagi sa snail mail. Ang atong address mao kini:

Love Story

C/o Banat News