Dihang nanihapon sila si Julieta ug Berto may nadungog silang makusog nga kulihad.
"Mura’g naa ra diha sa atong likod, da, Litang," ni Berto pa nga napikal. Mibarog si Berto ug miinom og tubig. Gikuha niya ang hait niyang sundang ug migawas. Sa paglipot niya sa may kusina maoy iyang nakita ang usa ka dako ug itom nga tawo nga naglingkod sa dakong sanga sa ilang mangga. Balhiboo’g nawong ug dagko ang mga mata. Labong og mga buhok. Agta! Agta! Misinta ang kahiladman ni Berto apan wala siya mahadlok. Gihugtan niya'g kupot ang puan sa iyang sundang ug gisinggitan ang agta, pero, sa kalma nga tingog.
"Hoy, Migo, nanihapon tawon mi, uy, ug ayaw tawon og pagsige'g kulihad diha. Wala kay batasan da!" ni Berto pa. Ug dihadiha mitubag ang agta, "hu, hu, hu, hu, hu, hu. Gituyo nako sa pagpangulihad aron moundang mo'g pangaon, ug ikaw, mogawas. Aron ka mahibawo, Bertoooo ... naibog ko sa imong asawaaaa!"
"Unsa to, ikaw naibog sa akong asawa. Suwayi'g binuang ang akong asawa, katilaw ka gyod ning hait kong sundang. Di ko mahadlok nimo, bisa'g agta ka paaaa ... nagsalig ka nga dako ka. Hoy, kun gusto kang mopuyo sa among mangga, ayaw tawon mi'g hilabti, uy..." Milanog ang tingog ni Berto. Migawas pod si Julieta ug nakita pod niya ang agta, ug nahadlok siya ug migakos kang Berto.
Pagka ugma, ilang gisultihan si Ingko Pedong, ang banggiitang albularyo sa ilang dapit. Kini si Ingko Pedong matud pa, nakasawo kuno'g mutya sa saging tindok ug duna kuno kini'y kusog nga talagsaon.
Usa ka gabii niana:"Hoy, Hudlong, kaila man ko nimo, ayaw baya'g binuangi ang akong pag-umangkon, ha, kay ako unyay imong makaaway. Kasabot ka haa....!" lanog ang tingog ni Ingko Pedong.
"Hoy, Pedong, komedya ra tong ako, uy," ni Hudlong agta nga nakaila ni Pedong. "Ibog ko pero dili nako hilabtan si Litang uy. Naa gud ka kusgan kaayo ka kay duna kay mutya sa saging tindok. Lupig ko nimo Pedong!" ug nagtaghoytaghoy ang agta. (Kataposan)